英國巨胸模特兒佐敦（Jordan）同英超聯球星約基（DwightYorke）嘅愛情結晶品夏菲（Harvey），一出世就不幸證實失明，不過早排佐敦帶夏菲上佢個電視節目嗰陣，佢先啱啱知道夏菲隻左眼原來對鮮豔嘅顏色有反應！我羅拉真係要寫個服字畀佐敦！
話說佐敦喺自己主持嘅BBC節目《Jordan:TheModelMum》入面，同觀眾大談湊仔經，其間佢拎住一個顏色鮮豔嘅玩具喺夏菲面前揮動，竟然發現夏菲隻左眼原來會跟住件玩具郁，佢重識伸手捉住件玩具㖭，簡直係天大嘅奇迹！
佐敦喺節目入面話，其實佢早排已經懷疑夏菲隻左眼對強光有反應，不過當時佢愛理不理，要個囝囝等到下年返醫院重新驗眼，先至再check吓有冇得醫喎！生咗個仔成半年先知夏菲唔係完全失明，佐敦呢個阿媽，認真懵到上心口！