經紀陳噚日畀電話小初，話佢揸住有兩隻股票停咗牌，個心撲撲跳，想搵人傾偈定吓神。小初心諗，你估小初係保嬰丹，食咗會定驚咩。
小初重以為乜嘢咁大件事，原來經紀陳揸住嘅富泰大中華（1226）同恒豐金業（870）分別停牌。小初問經紀陳，知唔知道發生乜事？佢話收到風，恒豐向一名大隻佬配股嘅大茶飯，終於落實。
唔怪得隻股在7至8仙水平浮沉咗好耐，但近兩日成交突然增加，噚日再升6.98%，至9.2仙才宣布停牌。
至於富泰大中華，經紀陳就話可能有啲不妙，原本佢諗住隻股1送1紅股，變相拆細後再炒，點知突然又變卦，搞到股價前日急跌二十幾個巴仙。噚日隻股停牌，經紀陳話收到風，隻股被監管機構抽秤，話貨源異常歸邊，唔知復牌時會係乜嘢光景。
小初安慰經紀陳，凡事難盡如人意，一隻掂一隻可能唔掂，亦算係咁啦。
慕容小初