恒指微升29點，地產股仍弱，銀行股硬淨，滙豐（005）升兩格，恒生（011）同中銀（2388）升1格。
中銀上月底成為恒指新貴之前，鬼子佬真金白銀嘜上8.65元，做咗成份股後跌到𠵱家8.25元，又再潛水25仙。聖誕將至，如果好似往年炒大銀行股，中銀有機會浮上8.50元招股價以上，如果個市繼續冇乜方向，中銀下跌風險亦有限。不妨以守候式揸啲低溢價嘅中銀Call輪。主要對象係9462，暫時要畀啲耐性，隻輪波幅好細，直至正股有稍大波幅為止。隻輪明年7月杪夠鐘，有足足7個月壽命，現價11.6仙，溢價2.3%，槓桿率7.1倍。𠵱家個市搵食難，想食大茶飯更難，博年底中銀冇咁醜見番招股價，距現價相差25仙，隻輪都有機會見13.5仙，升幅16%。畀啲耐性揸吓。
大隻嘢中，最醒係聯通（762），收5.95元，有20仙或3.5%進帳，幾隻聯通Call輪風騷，例如9512升25%，9064升15%，9536升12%，9141亦升12%。聯通Call輪追唔過，正股昨日升幅唔細，但成交減近4成，驚住冇辦法繼續撐上去。各聯通輪中，最正係9512，不過其實溢價唔算低，而交投又太疏，始終都係買唔落手。要落手嘅話，要等正股回番至諗。
章盛