拉傷條頸依然咁亢奮
歐陽震華揚言露B賀收視

歐陽震華前日拍攝《陀槍師姐Ⅳ》一場耍花槍的戲份時不幸拉傷頸部，昨日中午他因要接受治療，未能出席《談判專家》的收視慶功活動。監製鄺業生表示，若《談判專家》結局周收視達四十五點，將要歐陽震華及郭可盈齊齊着Tback益街坊。

無綫台慶劇《談判專家》上周最高收視有三十六點，即約二百三十七萬觀眾收看，成績十分理想，昨日一眾演員，包括郭可盈、文頌嫻、蔡子健及楊婉儀等在銀線灣桃源軒酒家慶功，由於男主角歐陽震華（Bobby）前日拍攝《陀槍師姐Ⅳ》時拉傷頸部肌肉，故此未能出席。

「以為視網膜脫落」
監製鄺業生表示，Bobby與蔡少芬拍攝一場耍花槍的戲份時，不幸拉傷頸部，需要睇跌打，其後記者在電視城化妝間遇上Bobby，他說：「拍耍花槍戲就容易啦，場戲係講我用塊面撞落地下，我真係撞咗落去，即時眼前漆黑一片，對白都講唔到，當時我重以為視網膜脫落㖭，坐咗十分鐘之後先好番啲，其後睇完醫生先知係拉傷條筋，我頭先搵咗個治療師嚟屋企幫我整頸，𠵱家已經好番八成。」
鄺業生昨日透露，估計《談判專家》結局周的收視會上升至最高四十五點，他聲稱到時要Bobby着Tback泳褲示眾，而郭可盈亦要着Tback，對此郭可盈說：「如果有咁高收視，我會着㗎，我好大膽㗎。」問她會否嚇怕男友林文龍，郭可盈說：「咁咪等大家開吓眼界咯！」

「我連樹葉都唔要」
而Bobby聽聞自己要着Tback泳褲後則說：「咁我露啫咯！我連樹葉都唔要呀，你哋一定要登呀！郭可盈到時如果唔着Tback，咁即係違反合約，佢着Tback幾正㗎，因為佢對腳夠修長嘛！」
採訪、攝影：楊潔雯