雖然十二月有唔少大作推出，不過大多圍繞RPG、AVG類型，格鬥就只得隻《GuiltyGearXX》較為吸引。呢隻Game如期喺昨日推出，今次除100%移植街機版外，重加入豐富嘅新人物同玩法，《打機樂園》重搵嚟高手教路，講解連續技重點，一於趁聖誕假期打餐飽。
記者：徐影龍
《GuiltyGearXX》喺五月曾推出街機版，要吸引機迷購買PS2版，當然唔少得追加大量要素。加入新人物唔在講，單單係Menu底下嘅選單，就已經足足有成11個咁多，除重現街機版嘅「ARCADE」，及例牌必有嘅對戰模式、練習模式外，重有故事模式，每人都有唔同嘅背景同爆機畫面，一路打落去會有劇情發展。另外重有一口氣打低一堆敵人嘅「SURVIVAL」模式，不過講到創意同挑戰性，就要數新加入嘅「M.O.M」模式，玩法雖然同「SURVIVAL」差不多，不過就多啲限制，戰鬥中途會因應玩家表現而有寶物跌落嚟，包括HP回復、分數等，最後以分數評定等級，話唔定等級夠高，可開啟某個隱藏人物都未定。
《GuiltyGearXX》以卡通風格表達，鮮豔七彩用色已經攞盡視覺上嘅效果，加上普通必殺技已經好有氣勢，若使用覺醒必殺技或一擊必殺技時，更有誇張動畫作襯托，爽快感簡直爆晒燈。一開始玩，可選用嘅人物已經達到20個，比街機版多出四個，兼且重有三名人物屬隱藏身份登場，雖然現身方法尚未確定，不過二十幾人，每人都有唔同嘅故事模式，真係有排先玩得晒，聖誕假都唔怕悶喇。
連技唔好一味貪多《GameWatch》編輯阿豪（D.R.）
今日特登請嚟《GameWatch》編輯之一嘅阿豪（D.R.）講吓戰鬥心得。呢位仁兄係香港《GuiltyGearXX》四大高手之一，有佢教路對於攻略Mission、M.O.M等模式都易得多。經整理後主要有兩大關於連續技嘅心得，首先佢提供大部份人物共通嘅連續技，均以拳→腳→斬→重斬→掃腳追打為主。其次係某啲人物雖然可接駁多次拳腳攻擊，不過由於系統設有修正值關係，以大量攻擊力低微嘅拳腳作連續技，會直接減低最後接駁嘅必殺技威力，表面睇好似Hit數極高，不過實則發揮唔到應有嘅攻擊力，屬好睇唔好食嘅連續技。
特報：《GuiltyGearXX》將舉行全港機迷大賽，有關詳情可參考《GameWave》討論版：