噚日喺黃大仙廟隔鄰、專為失業人士而設嘅「騰龍墟」開始營業，好多檔主同市民都大讚政府，話搞得好好，可以暫時紓緩失業情況。八方噚日特登落去睇吓市道係咪真係咁差，冇人肯買嘢。點知畀我見到經濟發展及勞工局局長葉澍堃喺度shopping。
葉局長認真識做，主持完開幕禮後，用咗二百六十八蚊買咗三隻VCD、兩盒杏仁餅、一盒柚子茶同五個香珠座，以實際行動支持香港經濟；檔主見到葉局長咁落力買嘢，表現得好興奮，猛咁多謝局長。
本來葉局長買嘢都好平常，但當佢走埋去一檔VCD時，猛咁話要幫吓香港電影業，隨手就拎起一套由鄭伊健主演嘅《我老婆未夠秤》，重同身邊名嘴黃毓民講，呢套戲應該幾好睇。
點知毓民即刻笑佢話，「你就想啦，你老婆未夠秤！」毓民重話局長「搞搞震、冇幫襯」。
點知葉局長一啲都冇俾毓民打擾佢買碟嘅興致，最後，佢除咗買《我老婆未夠秤》外，重揀咗由陳小春主演嘅《刀手》同粵劇《紫釵記》㖭。八方雖然唔知葉局長太太幾多歲，但可以肯定嘅係喺葉局長心目中，佢太太永遠都係咁青春，永遠都好似未夠秤咁！
（圖）葉澍堃（左三）買《我老婆未夠秤》VCD時俾毓民（左）窒，鄭大班（左二）都笑。 黃建通攝
傳真︰2623-9278
電郵︰