廣州豪宅向來集中二沙島同白雲區南湖邊，但坐落喺天河區，毗鄰華南理工學校嘅滙景新城嘅洋房，派頭原來都有番咁上下。首期共有一百間洋房，面積約三千七至過萬呎，每間售價七百五十萬至二千萬元人民幣，除咗屋大外，內櫳重好豪華㖭！
呢一百間洋房，每間連地庫共三層，有六成內置電梯貫通，小朋友同老人家唔使經旋轉樓梯上落，安全得多，的確住得矜貴。每部電梯價值十五萬至十八萬。
此外，地庫有特大浴室，既可浸Spa，又有桑拿同蒸氣浴房，重設家庭影院，享受一流。香港能夠拍得住嘅豪宅，相信都唔會太多，單係內置電梯呢項設施，十隻手指數得齊。
信和集團早前搞「信和商場禮貌店員選舉」，已經完結，總共收到二十四萬張選票，反應好熱烈。究竟邊個可以攞到獎？今個禮拜六揭盅。信和重喺大角嘴奧海城商場搞頒獎，乘機宣傳一吓，同場重請到青春派歌手麥浚龍同關心妍做表演嘉賓。有明星助陣，可帶旺個場，啲租客就開心啲。
代理為咗招攬客戶，真係乜嘢法寶都出齊，深圳福田嘅天健世紀花園，代理泛城（中國）就出到免費睇樓團呢招。今個周末組團到深圳實地睇樓，等啲客唔使擔心隔山買牛。
據泛城（中國）講，諗到搞免費睇樓團，係因為樓盤上周嚟港展銷時，好多客都話想實地睇過先買樓。唔知個團會唔會包埋食飯呢？
天健世紀花園共建三幢小高層及五幢高層住宅大廈，提供七百六十九戶，面積五百六至二千八百幾呎，預計後年五月入伙。
香港興業頻頻出招宣傳東涌新盤藍天海岸，實行要谷起東涌個樓市，等多啲市民認識呢個社區同前景。
雖然話係東涌，但係呢個新開發市鎮已經有大型鐵路運輸配合，搭地鐵就可以返屋企。香港興業當然就地取材，噚日個盤終於到戲肉階段，就係公布價錢嘞。正當傳媒都俾個價錢吸引之際，發展商送上一盒載有兩架機場快線同地鐵嘅模型車，再一次提醒各位，呢個係地鐵概念樓盤！
近年賣樓作風進取嘅長江實業，曾經試過一個禮拜每日一記招，噚日佢哋開完記者會講東涌映灣園，今日又嚟料嘞，重係打孖上，一日兩個記招。第一場係中午十二點，由營業經理郭子威打頭陣，介紹九龍塘畢架山一號嘅發展規模、設計概念、園林特色同景觀。
第二場兩點九，由執行董事趙國雄親身上陣，公布今個禮拜六首度公開發售長沙灣泓景臺五十樓以上嘅「BanyanSky」單位，重有全新優惠。吸取上環帝后華庭嘅教訓，今次可能要問清楚係公開淨係內購至得。
假如個個發展商都咁玩，一日兩個記招，啲記者就真係好唔得閒嘞。
上海世茂濱江嘅超級複式豪宅，會喺本月底公開拍賣，底價三千五百萬（人民幣，下同）。聽中原講，若果能夠用呢個價賣出，中記可以收到過百萬佣金。計落差唔多有三個佣，好賺過本港嘅樓盤。
呢個位於二號樓嘅三層複式單位，面積萬一呎，四套房、一書房同兩工人房，另有近二千呎空中花園。由於單位好矚目，所以想參與競投嘅買家都要先交一百萬做保證金，先至可以喺本月二十八日舉手競投。
蘭西
電郵地址：