臨近年結，二三線股仔mark價情況似乎非常盛行。經紀陳話，如果唔太大貪，又唔俾炒家發現嘅話，可以偷到食都唔定。
好似華聯國際（969）咁，隻股街貨向來乾到不得了，但好衰唔衰在今年7月，被人大整蠱，股價單日大跌7成，成個棚都俾人拆咗。
據聞幕後台資炒家仍然坐住好大手貨，只不過唔想再花錢將股價炒上，之後隻股喺冇乜成交嘅情況下，在0.30元至.0.40元之間徘徊。
經紀陳話，可能係年尾要埋數嘅原故，所以近排隻股亦有多少異動，噚日又升9.3%，收0.47元，係近1個月高位，但成交唔多，一副mark價嘅格局。
同類情況亦有冠華國際（539），小初早前都提過隻股，話有芬佬喺高位坐咗唔少貨，結果真係年尾不斷創新高，噚日再升7.2%，收1.34元。隻股今日公布業績，真係要睇吓盈利同股價係咪成正比。
慕容小初