記得早兩年本地曾掀起一陣Pashmina熱潮，舉凡出入Ball場的名媛闊太，都以身披一條Pashmina為尊貴的身份象徵。事實上，一條幾千蚊的Pashmina披肩，真係唔係人人都買得起，不過由今日起一連四天，喺佐敦會有一個披肩特賣場，所有來自印度的Pashmina披肩都只係一、兩百蚊條，同場重有過百款手袋任你揀，𠵱家就率先為大家示範多組配搭，想增添貴氣的話就咪錯過！
記者：尹珊珊
攝影：林栢鈞
ImageGirl：MayMay
今個冬天，民族風仍吹個不停，要趕趁潮流可選呢個充滿土耳其Feel的斜孭袋，用上牛皮及麖皮兩種質料製造，袋形呈不規則狀，不可容納太大物件，但平時去街用都無問題，再襯條簡潔的米白色Pashmina披肩，咁就襯到絕啦！
一般Pashmina披肩以淨色居多，好少有呢條格仔披肩咁花巧，玩漸變色兼且有格仔暗紋，披上身唔單止無咁老氣，摸上手的質感更輕巧，除了有啡變黃色之外，重有黑變灰、深淺粉紅、深淺紫同深淺藍共五色，襯埋呢個容量大的牛皮條子側孭袋，斯文得嚟又不失年輕感。
（披肩）原價：$868
開倉價：$200
貨量：50條
（袋）原價：$960
開倉價：$150
貨量：50個
Pashmina披肩之所以咁矜貴，只因Pashmina係世上最幼細的茄士咩，出名柔軟、細緻兼可保暖，其質料來自喜馬拉雅山特產的高山羚羊。據說，每隻羚羊在每年只可以長出80-100毫克的上等茸毛，要等三隻羚羊的茸毛自然脫落後，先至足夠收集來編織一條Pashmina披肩，故價值亦理所當然有番咁上下。
(披肩)原價：$660
開倉價：$100
貨量：10條
(斜孭袋)原價：$550
開倉價：$150
貨量：5個
今次開倉的披肩款雖然以Pashmina擔大旗，但場內亦會有其他質料的披肩供應，好似呢條同樣來自印度的雙面披肩，質料比Pashmina重少少，深色一面係真絲，淺色一面係羊毛，肩負保暖的重大使命，披肩頭尾兩端更繡有花花圖案，款式偏向女性化，平時返工的話，重可襯埋呢個可放A4文件的側孭袋。
(袋)原價：$450
開倉價：$100
貨量：50個
(披肩)原價：$668
開倉價：$200
貨量：50條
嫌淨色披肩太過單調，呢款漸變色Pashmina披肩有紅、黑、藍、黃等六個顏色，望落無一般淨色披肩咁寡，但同樣有多種顏色任揀。建議你不妨配個淨色的簡單手挽袋作伴襯，咁樣就唔會畀人眼花撩亂的感覺，好似呢個長形的手挽側孭袋，外表平實，勝在格數特多，可以放文件之餘，重塞得落大量雜物。
(袋)原價：$350
開倉價：$100
貨量：50個
(披肩)原價：$450
開倉價：$100
貨量：50個
冬季衣物一向以深色調子為主，撞鮮色披肩固然夠sharp，另一選擇重有呢條純羊毛製造的織花披肩，特點是全條以人手織上花紋，難得係個圖案唔覺老土，同款重有黑色。至於配搭手袋方面，唔想睇到人眼都花的話，有呢個出口日本的帆布側孭袋，內裏間隔多而實用，好似話曾經重被日本雜誌介紹過。
(披肩)原價：$998
開倉價：$400
貨量：10條
(側孭袋)
原價：$450
開倉價：$100
貨量：50個
Pashmina披肩另一特點是出名顏色勁多，想另類一點有呢件草綠色的披肩，望落唔會畀人有種好刺眼的感覺。手袋方面，不妨襯埋呢個杏色漆皮子母袋，除了兩個色調都好柔和合襯之外，呢個長條形的日本漆皮袋，重連埋一個同質地的銀包，可以放碎銀同十張信用卡，買來做聖誕禮品一啲都唔失禮。
(披肩)原價：$660
開倉價：$100
貨量：15條
(子母袋)原價：$560
開倉價：$100
貨量：60個
今時今日，8蚊雞頂多可以買串牛雜，但同樣用8蚊，𠵱家可以帶走呢個少女輕便手袋返屋企，款式方面重有長形手挽款同弧形運動款任揀，買個平時粗用都已經夠晒抵啦！
原價：$259
開倉價：$8
貨量：300個
見過唔少舖頭都有Pashmina賣，但係價錢就相差得好遠，最平可以去到一、二百蚊條，最貴分分鐘可以收你過萬，咁究竟真假Pashmina有咩分別？
有請曾就讀香港理工大學紡織系兼今次開倉搞手Alex，教大家點樣測試。
真正的Pashmina披肩係用動物纖維織成，質感非常柔軟輕身，但係假的Pashmina係用人造纖維織成，質感較重身，摸落有少少硬，購買時不妨拎上手判斷。
從真假Pashmina披肩各剪下一小條流蘇，再直接用火燃燒，可以睇到真Pashmina的燃燒速度比較慢，重會有陣好似燒頭髮的味道，因為動物纖維含蛋白質成份所致，至於假Pashmina的燃燒速度極快，一下子就剩番好少灰燼。
由於動物纖維每條的粗幼都唔一樣，織出來的披肩自然有疏又有密，可以將披肩扯開來細心一看，真Pashmina上面會出現一個個小窿，但其實並唔係鈎爛咗，只要用手捽兩捽就會將纖維攤番勻，至於假Pashmina係用每條均等的人造纖維織成，攤開後可見纖維排列得相當工整，兼夾密密麻麻，絕對唔會有一個個窿窿出現。
披肩手袋特賣場
地址：佐敦彌敦道219號莊士倫敦廣場地庫1B9號舖
電話：95778933
開倉日期：即日至12月15日
開倉時間：上午11時至晚上10時