財政司司長梁錦松噚日去南京出席「江蘇．香港周」活動，八方亦跟埋去，何解？因為阿松今次唔坐商務客位，而係坐經濟客位。八方問佢幾耐冇坐過經濟位，佢猛話無謂提。佢話今次「紆尊降貴」，係因為航程只係兩個半鐘，唔算辛苦，又可以慳錢。
對於此舉會否對其他高官構成壓力，佢話此事係由個人決定，而今日先至出現同一活動嘅財經事務及庫務局局長馬時亨亦係坐經濟位。
另外，據港府噚日向立法會提交嘅文件顯示，今次阿松去南京嘅來回機票，係用佢先前出差賺得嘅飛行哩數換取。
睇番各主要官員今年七月至十一月間出門累積哩數紀錄，其中以「唐少」唐英年最多，有五萬八千哩數，煲呔曾蔭權亦賺咗五萬哩數未用，跟住就係阿松。其他有哩數積分嘅包括葉澍堃、馬時亨及葉劉淑儀；「小公主」廖秀冬出門兩次，正申請「哩賞」；其他局長冇「哩賞分數」，原因包括未出過門、沒參加及冇申領。
講番阿松，八方去到南京出席當地為佢搞嘅記者會，先發覺佢好受歡迎，差啲迫爆間房，但主持記者會嘅當地人即場強調只可問同香港周有關嘅提問，冇得問「梁夫人」小伏，大家當堂冇晒癮。
傳真︰2623-9278
電郵︰