巨胸女星彭美拉安德遜（PamelaAnderson），喺九六年同佢當時嘅老公湯美李（TommyLee）度蜜月嗰陣，曾經自拍咗一盒交歡錄影帶作私人珍藏，點知餅帶後來無端端失蹤，原來有人將呢齣真人騷當四級小電影通街賣，就連旺角嘅信和中心都賣過一輪㖭！
不過當時西雅圖一間網絡公司InternetEntertainmentGroup，居然明目張膽喺網上兜售呢餅帶，重賣到十五美金（約一百一十七港元）一盒，不過據我羅拉所知，呢盒帶結果成為有史以嚟喺網上面最好賣嘅鹹帶之一。其後拉姑同湯美李喺九八年告佢哋侵犯私隱同版權，件案搞咗幾年，終於喺前日有裁決。
根據洛杉磯法官嘅判決，InternetEntertainmentGroup要分別賠償七十四萬美金（約五百七十七萬港元）畀拉姑同湯美李當係分紅，拉姑佢哋重可以獲得發還律師費同堂費。
拉姑同湯美李早排為咗爭兩個仔撫養權鬧到火紅火綠，今次講到錢銀，又突然變得同聲同氣，認真吹脹！