全新占士邦電影《新鐵金剛之不日殺機》上個月開畫至今，喺美國已經收咗一億二千萬美元（約九億四千萬港元），而全球票房更加勁賺二億一千五百萬美元（約十六億八千萬港元），睇個勢都破硬以前占士邦片嘅票房紀錄囉。雖然呢部戲下月三十日先會喺香港上畫，不過最終版本嘅宣傳海報已經出籠，張海報除咗有幾個主角嘅造型外，亦以冰塊做背景，真係睇見都覺得凍。