隔晚美股回升，估話港股點都會好啲，結果恒指最叻都係微升26點，埋單倒跌73點，係連續第4日下跌。
恒指成份股中，勉強最標青嘅係德昌（179），半年多賺34%，股價前日升15仙，昨日再有同樣幅度進帳。兩隻相關Call輪中，9435收83仙，升8%，有幾十萬份易手。隻輪明年3月夠鐘，溢價14.6%，槓桿率11倍。正股盈利增長雖然強勁，不過計落未來PE都成25倍以上，恐怕上升水位有限，9435溢價嫌過高，追唔過。另1件Call輪9279，昨日企定喺3.3仙，交投有限，有兩個幾月命，溢價9.5%，槓桿率27.6倍，到最後，會係咁先，又係博唔過。
和黃（013）亦係少數冇跌有升嘅大藍籌之一，收51.50元，爬高1格，最高做52.25元，爬高4格。熱門Call輪9518，曾經彈升10%，埋單42.5仙，仍跌1%。和黃喺月初由55.50元跟大市跌落嚟，喺50元邊邊搵到支持，未來兩個星期，有機會守落去，基金經理年底髹灰水，做高些少唔奇。吼住9518，低價收集些少。隻輪明年2月夠鐘，溢價4.6%，槓桿率12.1倍，數據算唔錯。
中信泰富（267）昨日收市報15.30元，上升5仙，睇多一陣，如果守得穩嘅話，吼相關Call輪9298。
章盛