呢個星期日,民間人權陣線喺港島區舉行反二十三條大遊行,雖然法律界、文化界、新聞界同埋教師學生以及一眾關注香港民主自由嘅人士都話一定會去,但係一班馬迷就可能唔會到。
事關嗰日咁啱撞正馬會一年一度嘅國際賽事日,世界一級良駒都會嚟晒香江,競逐四項錦標。八方問《蘋果》馬版同事,佢話連「世界馬王」威武神駒都會嚟沙田馬場競逐香港盃,其餘三項包括香港一哩錦標、香港瓶及香港短途錦標都係馬圈中大賽,香港盃嘅獎金重有成一千八百萬㖭。
八方知道好難同馬會主席夏佳理爭客,因為啲馬迷都好忠心,唔少重一早book定位。不過有口痕友話,二十三條始終關乎大家嘅權利同自由,應該可以再諗,嚟參加吓部份活動,表吓態再去跑馬仔都得㗎。
日期:12月15日(星期日)
時間:下午3時
路線:銅鑼灣維多利亞公園集合,遊行往中區政府總部
主辦機構:民間人權陣線
傳真︰2623-9278
電郵︰