美股周二晚如預期反彈，杜指升100點，收8574，納指升1.7%，收1390。睇完美股走勢，諗住昨日港股亦會跟隨反彈，可以低位撈回前日沽出的恒指Put輪9556。
點知港股高開17點便反覆回落，最後跌73點，收9784。趙飛雲如意算盤打唔響，恒指Put輪9556如阿崩叫狗，愈叫愈走，最後收0.119元，升8%。炒股票其實係上車容易落車難，趙飛雲上一個回合，揸恒指Call輪9552長達個多月，戰況節節領先，好似個杯已斟滿7成美酒，其實可以坐低慢慢嗒，但覺得美酒難求，重可以再斟多1-2成先至飲，結果出現意外打瀉，剩下只有1成多，正式係打瀉多過賺。
前事不忘，今鋪炒恒指Put輪9556自然唔想歷史重演，所以前日見美股及港股有反彈迹象，於是先沽大半貨避鋒頭，可惜估中周二晚美股反彈，但港股噚日唔跟，想高位追回沽出部份的9556，又怕美股昨晚再升逾百點，今日恒指連本帶利追落後，到時真係左一巴時右一巴，惟有安慰自己仍然贏緊錢。
恒指50日線目前在9669，港股昨日收市9784，相距只是115點，除非外圍再大插水，否則跌近50日線應先出現反彈，倉內9556尾數會伺機獲利。至於反彈阻力仍係頸線9880及20日線（現處9986）。
以現時趨勢，港股是「蛋散」市，彈完就散，候反彈買Put輪仍係主要策略。不過，做人不能死牛一便頸，如果恒指三幾日內大幅反彈三四百點，又是另一個故事。
趙飛雲