台灣人氣組合F4雖然好紅，但佢哋主演嗰套《流星花園II》喺台灣播映以嚟，收視一直麻麻。諗唔到張智霖同朱茵合演嗰套《如來神掌》喺台灣自禮拜一播出之後，收視就有3.35點，《流》劇就只得2.96點。
兩套劇都係喺夜晚八點播出，F4竟然俾張智霖同朱茵打低，令好多人都覺得意外，而身在上海嘅張智霖真係高興到飛起。
《流》劇收視唔掂好正常，因呢套劇貪名牌搵咗侯孝賢監製，佢又搵咗啲唔係咁務實嘅人幫佢拍，結果喺西班牙搞到一鑊粥咁，F4同大S徐熙媛都唔多妥班製作人，後來要柴智屏嚟收科先搞掂，不過西班牙好多戲份都要唔到。
另外，大S同F4嘅言承旭又拍到反面。大S日前鬧完言承旭脾氣古怪，前日又輪到言承旭搵經理人江一朋反擊話言承旭有種俾朋友出賣嘅感覺，因為佢話喺拍攝現場發脾氣，大S都有份！
黎淑賢噚日喺銅鑼灣出席活動，佢條頸貼咗塊膠布（紅圈示），佢話因為早排淋巴腺腫脹，前幾日割咗淋巴腺，但𠵱家重未知係乜事，要等下個星期化驗報告出咗先知，佢𠵱家講嘢同食嘢都會痛。
黎淑賢好擔心咁話：「因為嗰個位好多神經線，我都怕醫生割錯，會影響面部嘅神經，同埋我屋企人有遺傳癌症，不過醫生都叫我唔好擔心，話好小事喎！」
楊千嬅噚日難得放假喺中環行街，佢話近期除咗忙唱片錄音之外，亦開始準備嚟緊樂壇各大頒獎禮嘅服裝，千嬅話：「為咗唔想同人撞衫，我會搵形象設計Tomas幫我全權負責。」對於張栢芝又改紋身一事，佢話：「人哋嘅嘢我唔理，我唔會考慮紋身，我心口粒巨癦（箭嘴示）已經夠晒照啦！」
近日EMI唱片公司搵嚟商台前DJ陳輝虹擔任公司董事總經理，頂替離職嘅陳志光。陳輝虹曾經擔任商台首席創作總裁同音樂總監，而佢對呢份工作視為新挑戰，佢日前話：「香港唱片界將市場同噱頭放得比音樂重要，𠵱家係改變嘅時候。」新官上任，唔知樂壇喺嚟緊一年會唔會有一番新氣象呢？
古天樂、鄭秀文（Sammi）之前去咗成都拍新片《百年好合》，佢哋噚日返香港，見到Sammi一出閘就雞咁腳拉住啲行李勁跑，其實記者都係想問候吓佢哮喘好番啲未，見佢咁走得，都應該冇乜事！而古仔就話：「去成都機場時，差啲發生車禍，好彩有驚無險啫，不過我就唔敢喺架車度瞓覺！」
陳法蓉𠵱家學緊電單車，咁啱早排內地有人搵佢拍個電單車廣告，真係啱晒佢。陳法蓉講起學電單車，之前第一次上堂就炒車，佢就話有記者喺度影相搞到佢唔專心先會出事，重話之後冇記者在場就進步神速，遲幾日就要考強制試，佢話希望自己有信心，唔想做第一個車死人嘅港姐喎！