恒發（097）噚日除息，以前收市價7.40元計，變成7.29元，收市報7.20元，跌1.2%，成交達4796萬元。
ｉ師傅話，早前有炒家以為恒地（012）會大幅調高恒發私有化價錢，但結果恒地只將價錢由7.35元調高至7.60元，較芬佬股東要求之10元水平相距甚遠。一般人估計私有化難以成功，恒發有機會回至6元以下水平，據聞有炒家已準備散貨。不過，恒發派息頗為吸引，加上私有化尚未宣布失敗，所以炒家決定持有至除息後才逐步散貨，恒發後市估計有壓力。阿虎就認為，既然恒地提出7.60元私有化恒發，若恒發股價跌至6元以下水平，相信四叔與恒地都可能出手接貨。
中國燃氣（384）復牌，原來只係公布直接與宜昌市成立合資公司，投資當地燃氣項目，毋須透過與海峽金融成立之合資公司去投資。消息冇刺激，散戶自然走人，股價一度下挫6%，低見0.93元。Cookie話，呢間公司每隔兩個禮拜就公布一次投資新項目，炒家經常叫人跟炒，但噚日復牌全無鑊氣，相信下次都好難搵捧場。據聞隻股下次公布之項目會係湖北省隨州及十堰，睇嚟都唔會有太大刺激可言。
藝立媒體科技（8192）在高位徘徊一段短時間後，噚日似乎開始有人捱唔住要散貨，由於冇乜買盤承接，一度跌至0.25元招股價水平，跌幅達43.8%，收報0.33元，跌幅略為收窄至25.8%，不過成交只有36萬元。黑客話，股價未破底，睇嚟散貨仍算有秩序，相信出貨者係幫莊而已，幕後炒家應該仍有力支撐大局，不過股價短期若唔反彈，咁就好難講。
阿虎