警方噚日凌晨喺赤鱲角機場舉行代號「奔雷」嘅反恐演習，警方高度重視，重破天荒畀傳媒採訪。八方聽同事講，為咗採訪要忍受天寒地凍，喺機場跑道對開嘅荒野企足三個鐘，靠自己帶去嘅手電筒照明，先可以在採訪簿上記錄所見所聞，都咪話唔辛苦。
不過，最大嘅考驗就係「人有三急」嘅時候冇得去洗手間。有見及此，警察公共關係科（PPRB）除咗安排「PhotoCall」（攝影時間）外，重專登安排埋「ToiletCall」（去洗手間時間）。
PPRB一哥總警司鄧厚江重同記者講笑，唔好諗住周圍「黑麻麻」，以為企埋一邊搞掂都冇人知，因為現場有配備夜視鏡嘅狙擊手，現場每個人嘅一舉一動，佢哋都一目了然喎。
傳真︰2623-9278
電郵︰