廣生行旗下元朗低密住宅逸翠軒，噚日宣布推出發售，原來只係賣一個，重係呎價最平，1688蚊。
廣生行銷售及租務經理李銘婷謂，逸翠軒先以「心動價」最平每呎1688元推出一個分層單位，至於連花園或天台嘅單位，則接受買家洽購，短期內公布公開發售詳情。
獨家代理嘅中原地產執行董事陳永傑透露，呢個呎價最平單位係7座低層，656方呎，售價110.7萬。
總共有64伙嘅逸翠軒，示範單位設喺1座1樓A室，724方呎，連平台花園。凡參觀嘅買家，可以得到一份「雙妹嚜」禮品，內有花露水、爽身粉、紅棗、黑豆健康食品、滑鼠墊同各產品使用說明書。禮拜六、日，更有香薰工作坊、園藝示範𠻹。
點解廣生行會送呢啲嘢畀睇樓客？因為呢啲係廣生行代理嘅產品，當中嘅花露水，係二三十年代女士們嘅至愛化妝品。
深圳大量樓盤來港推售，發展商要吸引買家，不惜工本搭建靚靚示範單位，𠵱家連售樓書都好肯落本同落心機。蘭西啱啱收到深圳朗晴馨洲嘅售樓書，發覺佢哋認真夠創意。
售樓書唔再係傳統咁一本書仔，而係用風琴式設計，重有樓盤嘅平面圖，背面原來係一啲應該係小朋友畫嘅畫，夠特別。
呢個樓盤係單幢樓，高三十二層，共四百零六伙，面積三百八十幾到九百幾呎，明年八月入伙。首批八十個內購單位，唔使三日就賣晒，另兩批加推單位共一百多戶，售價十八萬起，最貴唔使四十萬。
聖誕節臨近，唔少機構都會為弱勢社群送上關懷，美聯物業嘅美善會，前日禮拜二，一行十多人到「麥當勞叔叔之家」，為癌症兒童舉行聖誕嘉年華。
其中一組義工專責煮嘢食，另一組就做布置工作，美聯重有同事扮聖誕老人，向小朋友派送禮物，同小朋友一齊影相。
美善會喺前年四月成立，透過做義工回饋社會，今年已經做成咗十二項慈善活動。
一向喺賣樓宣傳上都好有心思嘅香港興業，為咗東涌藍天海岸個盤，除咗搵唔少專業人士講吓佢哋新思維主題，拍咗唔少宣傳硬照同短片外，對記者都好有心，之前已經送過蘭花、雨遮及八達通套等。
唔知係咪想提醒蘭西，個盤會喺聖誕節賣，噚日又專登搵人送咗棵光纖聖誕樹，同裝滿零食嘅聖誕靴嚟，棵聖誕樹識閃又識轉，好有聖誕氣氛，若果有埋聖誕音樂聽就完美嘞。
另外，香港置業噚日發展藍天海岸新思維實地啓發團，搵咗六部大巴，載住三百名前線精英，到樓盤現場去探索乜嘢叫新思維。
蘭西
電郵地址：