喺深圳市區內日蒲夜蒲，要接受好多外省文化，廣東特色少咗啲。上星期親自到郊區的松崗鎮走一趟，發覺當地的粵語一樣通行無阻，卻又多了台灣的文化，東南西北中滙聚一堂，盡顯在一條夜市食街上，百多檔的小食攤檔，吃盡各地的特色風釆。食飽後再去夜總會耍樂，原來到小鎮玩一日都可以咁精采。
記者：辛汀
攝影：陳奇
我喺羅湖搭了?150的士去松崗，行濱海大道，轉入深穗高速公路，再兜入107國道，一個鐘頭就到達人流最旺嘅松明大道。夕陽下看見好多人推着車仔攤檔，擠往沿河南路的明渠旁，於是就落車打聽。嗰位大哥好客氣咁話：「日落西山，華燈初上時，你再來一趟吧，你會發現百多檔熟食檔，整齊排列等你檢閱，食物價廉物美，一定可以吃得飽飽！」晚上七點再來的時候，果然燈火通明，迎風吹來一陣陣燒烤嘅肉香味，先買幾串羊肉當小食，隨即展開咗一陣秋風掃落葉嘅試食行動。
喺夜市見到兩位來自安徽安慶的小妹妹獻唱，客人點唱一首歌，盛惠?5，好聽與否見仁見智，但觀乎兩人的表演，就絕對壓得住場。一曲過後，本來只打算跟小妹妹閒聊幾句，殊不知她們甚懂生意之道，隨即要求點唱多一兩首歌。左邊的小紅話：「因為我哋窮，阿爸阿媽帶我哋來南方搵食，如果掙唔到錢，我哋唔敢返屋企㗎！」好一闕天涯悲歌，真慘情！
珍珠奶茶本港有好多，但係波霸奶茶就比較少有。老闆話：「我哋嘅奶茶，係用木瓜和牛奶攪勻，再加入珍珠，台灣人叫佢做波霸奶茶，飲落好暖胃，特別啱胃酸過多嘅人飲。」
行勻整條食街，發覺只有幾檔水果檔，不過水果種類夠晒多，有水晶梨、木瓜、西瓜等，而且排得整整齊齊，睇見都想買個嚟食。顧客圓圓就推介我買木瓜，「𠵱家天氣乾燥，喉嚨乾涸，最啱以木瓜燉雪耳糖水潤一潤。呢種迷你木瓜特別甜，而且多汁，比起一般的木瓜香好多。每隻?5都算幾抵！
路過茶香亭，聞到一陣煎餅香味。煎餅以台式方法炮製，就係喺餅中加入餡，餡料有紅豆沙、奶油、香菇蘿蔔絲等，悉隨所好任君選擇。鍾意的話，大家重可以自己動手做，夠晒有風味。
聽個名還以為是甚麼新款食物，睇真啲原來係米粉。清淡嘅米粉吸收咗骨湯，配上肉醬、辣椒油、葱花等配料，天寒地凍都可以吃出一身汗，唔怪得三位靚女搶住爭食。呢啲風味螺絲粉食落好滑，好彩唔係用象牙筷子，而係用粗糙嘅木筷，咁先至夾得住。
呢檔阿里巴巴羊肉串燒烤，帶有濃厚甘肅蘭州的風味。燒烤到快熟時，撒些少香料孜然喺肉面上，羊肉香味盡釋。拎着羊肉串沿路邊走邊吃，很愜意。不過羊肉肉質麻麻，比較多筋，咬落有啲黐牙。
唔好睇攤檔咁簡陋，每個月要交六百蚊租金。老闆話：「好多人一買就買十串、八串，所以我哋一晚賣二、三百串烤羊肉都好平常。再加埋烤香腸、烤雞翼等，一晚閒閒哋做五、六百蚊生意，所以收入算唔錯！」
呢檔重慶鴛鴦火鍋嘅老闆雖然係四川人，不過識得用米酒煮姜母鴨，而姜母鴨亦係佢哋嘅招牌菜，吸引好多喺松崗工作嘅台灣廠商幫襯，?50享受到家鄉菜，實在好實惠。林老闆話：「加埋黑芝麻油會更加香口，不過會較為燥熱，受唔到會食到流鼻血！」
松崗工廠林立，食厭咗飯堂嘅打工仔，幾個人圍埋一堆食鴛鴦火鍋，百零蚊埋單，四個人分攤，二、三十蚊就已經好豐富。
寒風凜凜，坐喺街邊打邊爐，別有一番滋味。有肥牛（?20）、羊肉片（?20）、青菜（?3）、金菇（?5）及吊片（?20）等熱門火鍋料，若自問膽識過人，不妨一試未經化學劑漂白，外表黑茸茸的毛肚（?15），雖然賣相較差，但爽口度足以補償一切，蘸上台灣牛頭牌沙茶醬（?3），味道不俗。