十二月六日本欄寫《貝加演講》，貝加就係GaryBecker，經濟學界無人不識。文字刊登之後，賓架P打電話嚟取笑左丁山：「你識唔識㗎，GaryBecker寫成GuyBecker，下次上網查清楚啲啦。」真面懵，都唔知自己啲英文字會寫得咁潦草，Gary竟變成Guy？以後都係要盡量寫少啲英文，以免手民之誤。
賓架P對英文甚為講究，兼且博聞強記，久唔久就拋一兩句英文書包，成班老友都服咗佢。想當年，左丁山打鬼佬銀行工之時，對英文亦打醒精神，近十餘年都未再與英國美國人共事，自覺英語水平係退步咗。記得某年美國佬上司嫌左丁山英語發音唔好，畀公費左丁山去上堂，喺中大校外課程部學英語發音，老師就係黃麗松校長嘅大佬黃麗文。黃老師教嘅係RP發音（ReceivedPronunciation），即係正宗牛津音，或稱BBC英語，係英國皇室、首相、文人嘅發音！大家聽完BBC廣播，再聽吓球星碧咸、奧雲、舒利亞或費格遜爵士嘅口音，就知道兩種發音完全唔同。左丁山學完之後，返到銀行與美國同事講英文，佢哋聽到暈咗，於是左丁山講英文，英美音夾雜，自己有時都講完先至發覺。上星期《經濟學人》一篇文章話，英國人識講RP音嘅，唔夠三巴仙，而且英國人認為講RP音之人，給人一種唔誠實嘅感覺，但因為英國以外人士唔識聽蘇格蘭、威爾斯、紐卡素口音，英國商人又加緊學習RP喎，所以英國RP教師好好生意！