民主黨新任副主席李永達被指泊霸王車，重搞到要勞煩警察了解來龍去脈，真係大件事。話說達仔喺十二月二日，發動咗一大班貨櫃車司機喺葵涌區慢駛遊行，想話爭取平價車位。嗰日佢上晝九點就將座駕泊咗喺葵涌葵和路一家停車場，四個鐘之後，唔知佢係唔係唔記得，冇畀二十蚊泊車錢就走咗去，結果因為泊「霸王車」勞動警員到場調查。
八方問達仔，究竟搞乜鬼，佢話已經畀咗份書面口供警方，而既然停車場係要收番嗰二十蚊停車費，佢亦以雙掛號嘅方式寄咗張支票去，佢哋應該已經收到。
據達仔講，當日佢同一眾爭取停車位減價嘅貨櫃車司機一早凌晨時分已經將架車泊咗喺度，因為星期一大清早行動，阿Sir都知佢哋集會遊行後就會開走，咁遊行完畢，佢咪同班司機去攞車，然後順序開走，個個都冇問題，但係輪到佢，管理員就話要收錢。當時落緊大雨，管理員又話要問阿Sir，於是問得嚟達仔已經開車走咗，事情大約係咁，不過既然泊停車場一定要收錢，就畀囉。
咁又係嘅，泊得喺停車場，好難叫人唔收你錢。至於嗰二十蚊唔係關鍵，所以就算停車場收到都未必肯罷休。
傳真︰2623-9278
電郵︰