早幾日美國田徑總會發布年終成績表，田徑壇一對「金童玉女」（形容詞係指雙方成績，唔係講樣貌）「怕醜仔」蒙哥馬利同女友鍾絲榮膺最佳男、女運動員，點知國內某中文網站即刻發放一段洋洋灑灑成三千幾字嘅文章，詳細解構其貌不揚嘅蒙哥馬利點樣用五招𠝹鍾絲，都幾攪笑。
文中講到蒙哥馬利好虛心請教師姐意見、豎立頑強拼搏努力嘅形象啦。又講當鍾絲與前夫亨打感情破裂時、借出「肩膀」加以安慰。而且蒙哥馬利為投其所好，閒時陪鍾絲打籃球、遠足同玩越野單車，加埋利用傳媒「搭路」，總之內容嗰幾招用嚟「冧女」真嘅好掂。
不過早排佢哋訪港期間，我本人曾經同呢對戀人做過訪問，發覺蒙哥馬利為人好怕醜，唔似係個種會宣揚自己點𠝹女嘅人，睇怕呢篇報道孰真孰假？就由各位讀者作出「明智」判斷囉！
無復以往「戰神」本色嘅「巴迪高」，噚日喺班波操練嗰陣，重有唔少羅馬球迷出言辱罵佢㖭！「巴迪高」，如果我係你就叠埋心水喺一月轉會期走去英格蘭搵食囉，話晒嗰邊球迷出名熱情啲，亦較為尊重足球員，點都好過𠵱家喺羅馬坐冷板，不過首先佢要減薪，因為聽講𠲖家佢一個禮拜有成一百四十萬港元人工呀。
阿仙奴後衞基昂畀英足總用錄影帶「秋後算帳」，話佢對曼聯時蓄意推跌雲尼斯達羅。就喺英足總重未有起訴決定，基昂竟然承認佢真係有咁做！呢招「公開認錯」認真係正面教材。話時話，噚晚一位資深電視新聞報導員將阿仙奴中場韋拉講成「韋利」，又使唔使認錯呢？
維拉前鋒哥治喺今季無乜上陣機會，最近就有唔少甲組會想借用佢，不過泰萊就叫大家死心，話明唔會外借呢個由佢一手引入嘅高佬。事實上𠵱家維拉陣中有成四、五個前鋒，淨係打國內賽事真係嫌多，既然用唔到，畀佢出去踢吓正選Keep住狀態都好吖！泰萊，唔好為咗掩飾你收購失敗，而夾硬留人喎！
紐約人冇中鋒梗係輸啦！
前紐約人老將奧克利前日狠批評紐約人今年班費喺全聯盟最高嘅九千一百萬美元；但係隊波最少有四、五球員根本喺垃圾，一文不值。其實紐約人真喺抵鬧，隊波𠵱家充斥成班身高成六呎半嘅得分後衞同小前鋒，卻嚴重缺乏中鋒同控球後衞，得分集中晒喺史比維爾同侯斯頓身上，其他球員只喺陪襯，唔成日輸波就奇啦！