臨近年尾，不少公司以開倉形式來促銷貨品，真係只要你有錢，幾平嘅貨品都可以買到。近年以平、靚、正家品在香港打出名堂的「買得好」百貨，適逢今個月為一周年紀念，所以在其大埔中心分店實行以開倉清貨價益顧客。主要清貨以木製衣櫃、書架、地櫃最抵買，最低可減至4折發售；另外，家居小電器、寢室用品或小擺設均有超筍價，家陣只有3日狂減，真係要Call定車去到大埔掃貨喇！
記者：梁煒健 攝影：陳穎
ImageGirl：DonKok
客廳推介
一直以來「買得好」的家品均較其他店舖平，而質料亦唔差，所以經小記格價後發覺開倉價較其他同類型貨品平至一半，認真抵買。香港人乜嘢都喜歡收藏，如男性喜歡儲漫畫、書刊及潮流興收藏玩具，而今次開倉大傾銷其中最吸引小記就係呢款6呎高五層書架，間隔的層板可自行調校，屋企有番咁上下嘅朋友，不妨買多幾個，$169.9真係無敵價平通全港。
尺寸：70吋高×23.5吋闊×11吋深
原價：$259.9
街價：$369
開倉價：$169.9（限售200個）
「嘩！有冇搞錯，唔使$600就買到一套組合櫃！」小記做街訪嗰陣，就經常聽到呢句說話。的而且確，60吋闊的地櫃有6個櫃桶，中間以趟門式設計，夠晒大體；加埋櫃上另附送兩組頂櫃，襯埋更美觀。一般家居廣場真係要賣$1,600至$1,800不等，家陣開倉就4折發售，問你點頂！只不過屋企地方唔夠大就未必擺放到佢嘞！
尺寸：70吋高×60吋闊×23吋深
原價：$1,499
開倉價：$599（限售50套）
現時這類梯邊雜物架最受歡迎，一來輕便易安裝，二來夠穩陣擺放重嘢冇問題，而且自由度高，層格可自由調校十分方便。除了有26吋闊外，還有其他較闊的電鍍梯邊雜物架特價發售，共有8種款式選擇。
尺寸：36吋高×26吋闊×13吋深
原價：$269 街價：$299
開倉價：$159（限售400個）
這個有6呎闊的電視組合櫃，全身以優質木料製成，中間又以磨砂玻璃趟門設計，而兩側各有3個櫃桶，十分實用之餘又夠高雅。家陣差不多以45折計算，想換大廳家具就要嚟睇睇嘞！
尺寸：22.5吋高×72吋闊×22吋深
原價：$1,499
開倉價：$699（限售50個）
睡房用品
雖然這類木製衣櫃通街都有，但每每都有好多顧客四圍度尺寸check價錢，正價發售時銷售量都唔錯。這款雙門、雙櫃桶式的木製衣櫃，除咗外貌唔差外，用料夠襟，內裏間隔亦相當實用，家陣平多二百幾蚊，剛換屋嘅朋友可以考慮一下。
尺寸：80吋高×47.5吋闊×22吋深
原價：$939
街價：$899
開倉價：$699（限售100個）
呢類矮身衣櫃非常普及，但就售價一啲都唔平，有些家居店會賣過千蚊。這個以優質木料製成的35吋闊中衣櫃，右邊5個櫃桶設計放內衣，而左邊則可掛褸或恤衫，十分實用。
尺寸：42吋高×35吋闊×23吋深
原價：$799 街價：$750
開倉價：$499（限售50個）
如果呢類特大型咕𠱸喺高檔百貨公司發售，隨時要$500一個，固然物料會靚啲。這款大咕𠱸布料一啲都唔曳，有獅子、皇帝及圓點三款，既高貴又好攬。
尺寸：28吋×28吋
原價：$99
開倉價：$69.9（限售400個）
小家電
保暖壺賣到$16.9一個，而且可盛載保溫16公升嘅食水，真係唔知要買幾多個好嘞！
原價：$24.9
街價：$49
開倉價：$16.9（限售500個）
家居小擺設
聖誕節即將來臨，固然要買棵聖誕樹應吓節。這棵3呎高聖誕樹，駁上電源後其光纖燈飾就會亮起，十分吸引。除了光纖聖誕樹有特價外，另有細細棵的聖誕花及雪花松果聖誕樹平售，9.5吋高聖誕花每棵售$15.9，12.5吋高雪花松果樹則售$24.9，全部貨品十分充足。
原價：$149.9
開倉價：$129.9
今次開倉以地櫃及多用途架減得最多，睡房家具則有衣櫃、睡床等亦有平賣，所以想重新布置大廳及寢室就係時候喇！
由於部份產品均為陳列品，售完即止，所以要第一時間去掃減價特別多的產品，如衣櫃、地櫃等，但就要小心睇清楚有冇破損才好買；即使有破損，亦要睇自己可否接受。另外，開倉貨品中亦有不少浴室用品、膠箱、小家電及三座位梳化有超筍價，不過貨量充裕，還是先行掃小記推介的貨品。
買家直擊
買得好
電話：26606733
地址：大埔大埔超級城E區2樓352至355號
開倉日期：即日至12月13日
營業時間：早上9:00至晚上9:00
備註：購買貨品滿$399，可提供免費送貨及安裝服務，現金及Visa均可。