呢個世界真係乜嘢人都有,經常聽到有啲瘋狂fans迷偶像迷到幻想自己同人哋結咗婚,又或者為咗偶像而自殺,不過𠵱家啲星愈嚟愈識利用法律,一覺得自身有危險就即刻申請禁制令。
繼伊莉莎伯凱莉(ElizabethHurley)、史提芬史匹堡(StevenSpielberg)同美琪賴恩(MegRyan)之後,前日終於輪到小天后BritneySpears同fans開戰。
啱啱二十一歲嘅Britney,今年生日原來過得唔多開心,原因係有個四十一歲嘅日本男歌迷MasahikoShizawa(音譯志澤雅彥),原本好地地住喺日本橫濱,九月時專登飛去美國日日苦纏小甜甜Britney,唔單止成日喺佢屋企周圍係咁兜跟出跟入,重寄埋啲無聊肉照加情書畀Britney,最慘係連Britney嘅父母都搞埋,不斷咁騷擾佢哋,試過有一次重想靜雞雞入Britney嘅香閨!
Britney當然佛都有火啦,前日佢正式向洛杉磯法院申請禁制令,要呢位怪雞叔叔起碼遠離佢三百公尺以上,更加唔可以透過任何方式同佢聯繫,否則告到佢甩褲咁話!