聖誕節、新年除咗去Ball去Party之外，重有乜好玩？記唔記得舊年喺紅磡碼頭旁、以刺激機動遊戲為賣點嘅「冬日嘉年華」？由今個星期六開始到明年二月，同類型嘅「環球嘉年華」又嚟喇！今年更移師到舊啟德機場停機坪，地方大啲，機動遊戲、好玩攤位多啲。雖然重未完全搞掂，但已經好心急？今日一於率先帶大家睇睇邊款最正、最刺激啦！
記者：劉耀祥 攝影：陳盛臣
於九龍城舊啟德機場停機坪佔地約50萬平方呎的「環球嘉年華」，單是地方已較去年面積多出三分之一，設有53個機動遊戲、42個遊戲攤位和40個美食精品攤檔，是全世界最大型的流動遊戲活動，主辦機構還打算申請入健力士紀錄大全。
機動遊戲指定動作必定離不開過山車，但係向來經得起「考驗」嘅香港人又點會被普通嘅過山車嚇到？所以主辦單位就引入這款WildMouse過山車。睇落WildMouse外形同其他過山車差不多，不過，最刺激之處在於每個座卡均會轉動，即係隨時大家會坐住架「倒頭車」、「側頭車」嘅過山車，雖然冇360度大迴環，之但係WildMouse最高都有成12米高，要喺12米高上面坐住過山車轉吓轉吓都咪話唔刺激。
刺激度：激激激激
收費：2-3個代幣
首次在香港出現的「異獸奇程」，由美國荷李活特別效果設計員設計，而且重要係全球首次展出。單看隻異獸外形已經夠晒驚嚇，當採訪時正值「泵氣」時間，睇見兩隻大牙不斷有水流出，真係幾恐怖。而且重要由「異獸」的口進入，由尾部穿出，沿途「景點」就是「異獸」內的各種內臟，食道、胃及腸等一覽無遺。不過當然並非得個睇字，「異獸」內裏每個部位都會令玩家各有不同感官經驗，包括視覺、聽覺、味覺、嗅覺及觸覺等。
刺激度：激激激
收費：2-3個代幣
上次冬季嘉年華令唔少人大排長龍嘅「驚呼狂叫」(GForce)，可能好多人已經領教過當中嘅厲害之處，所以今次載譽歸來，而且重要起雙飛，特別運來兩部GForce任你揀，雖然外形稍有分別，不過同樣可以將你帶到去40米嘅高空，讓你遠眺整個一望無際嘅舊機場景色，或者可以將整個九龍城盡收眼底。而每部GForce每次只可乘載八個人，難怪要運兩部嚟疏散人潮，想玩就要早啲去排隊啦。
刺激度：激激激激激
收費：6個代幣
飛天雙「唇」，其實係指兩部全新機「Evolution」及「Revolution」，兩部都係以「Fing」為大前提，最啱就係鍾意「Fing」嚟「Fing」去嘅朋友，真係「Fing」到你甩籮。「Evolution」就係兩邊擺之餘再喺度自轉，想唔暈都幾難。而「Revolution」就成班人排排坐，之後就前後擺動，再加上下面不斷有水噴上嚟，隨時都會玩到濕身。若果夜晚配合埋燈光效果及強勁音響，刺激度絕對可以大大增加。
「Evolution」刺激度：激激激激
「Revolution」刺激度：激激激激
收費：3-4個代幣
嘉年華內可謂動靜皆宜，若嫌機動遊戲太刺激，不妨玩吓攤位遊戲，贏番個成個人咁高嘅公仔，用嚟送畀女朋友就實冧死，而場內全部禮品都係由歐洲運嚟，總值有成2,000萬，睇吓你可以拎得幾多個走！
機動遊戲對於小朋友來講未免刺激咗少少，所以「環球嘉年華」都設有唔少專供小朋友玩嘅小型機動遊戲，種類方面一啲都唔比大型機動遊戲輸蝕，而收費就只係大型機動遊戲嘅一半，就算小朋友嚟到都一樣可以要幾激有幾激！
「環球嘉年華2002/3」
地點：前啟德機場停機坪
日期：2002年12月14日至2003年2月9日
開放時間：平日1:00pm-11:00pm
周末、周日及公眾假期提前至中午12:00nn開放
平安夜、除夕及年廿九延長至凌晨1:00am
費用：免入場費，代幣每個$10
交通：七條免費穿梭巴士路線(包括九龍灣德福、屯門、元朗、上水、大埔、將軍澳、西九龍)穿梭巴士查詢電話：28826223