年近歲晚，特別多派對、晚會。唔好以為經濟不景，公司削雙糧或者停發雙糧，就會少咗啲年晚飯，其實重有好多公司賺錢，特別係一啲做中國生意、內地設廠嘅工業家，賺錢冇人知，最好嘅事就係境外賺錢，香港唔使交稅，內地稅點交法，可以有商量，老細收埋啲錢，如果唔買大豪宅，唔會引起注意。
工廠Ｗ同一班同行最近要搞公司聯歡，想請歌手助興，點知一問價錢，好似幾貴噃，於是互相交換消息、問價，上個星期仍然猶豫不決。工廠Ｗ同左丁山講：「成班老友坐埋，收集到呢啲嗌價：鄭伊健冇期，唔唱；李克勤一晚十五萬，所謂一晚，即係少過一小時；朱茵唱三幾隻歌就鬆人，四萬，夾埋梁漢文唱一晚，十二三萬；至於葉蒨文，友情客串一晚，五十萬！我哋都唔敢點還價咯，一啲職員話要搵青春派歌手，但我都未聽過佢哋啲名，唔制；搵一啲更老牌嘅，職員比較年紀輕，佢哋又唔制。唉，估唔到有知名度、識唱歌，就可以咁好搵！」
價錢就係高啲，但未必好搵啩，一年有幾多個聖誕新年黃金檔期啫，搵晒都係二十晚左右。工廠Ｗ回應：「唓，如果一年唱三十晚，就有三百萬，生活可以好舒適啫。我哋要做三百幾十日噃。」各有前因莫羨人，歌手有人要，唔識嗌價即係搵自己笨；冇人要，佢哋就會降價啦。