八方同流動通訊界人士傾起，噚日可謂有人歡喜有人愁，因為SUNDAY失驚無神炒咗八十八名員工，搞到內部一片愁雲慘霧。但數碼通就好巴閉，上星期帶記者到日本考察後，噚日又喺半島酒店開大型記招，公布一大堆同日本夥伴合作之流動多媒體服務。成堆MMS之中，除咗新聞資訊、天氣、遊戲，八方認為最值得介紹畀男士嘅係其中一個「大開眼戒18Plus」成人頻道。講明成人頻道，當然唔少得香豔圖像，最抵死係有三級廣播劇收聽，八方未聽過內容，但淨係睇到啲鬼咁露骨嘅劇名，加埋每6秒都只係6毫子，就覺得好似佢哋啲單張所講──內容引人入「性」，讓你隨時「大開眼戒」！
除咗數碼通，和黃嘅英國3G服務亦可能會提供成人服務。不要少看有關業務，據統計，成人網站亦是少數能夠賺錢嘅公司。和黃冇刻意推廣該服務，只係喺佢哋英國3G嘅網站內，用戶只需登入網上登記部份，按「視像短訊」，就會見到一個好得意嘅短訊內容，內容係乜？睇到畫面就「盡在不言中」。
傳真︰2623-9278
電郵︰