政府公布九招後，市場氣氛好番啲，短炒個案又見增加，鴻運朱惠文話，沙田嘅沙田中心廣寧大廈，啱啱就成咗單短炒，高層H室，不足四百呎，個炒家喺十月下旬用六十八萬買返嚟，略為裝修一吓就放售，結果七十八萬賣咗，扣埋啲費用都賺近八萬蚊。
而利嘉閣汪玉珍透露，佢哋一個熟客，十月用六十九萬買咗個大埔中心20座中層C室，再花兩萬蚊為單位裝身，最近以八十一萬沽出，兩個月升值一成七，扣咗使費都執六萬銀。
呢啲冷門屋苑都有炒賣，聽講最主要係價錢平，一百萬唔使，風險大極有限。當然，炒家每次都只可以執少少，但勝在容易食。
若果要賺得多嘅就要炒市區熱門屋苑嘞，好似美聯陳瑞章話，紅磡海逸豪園4座高層C室，原本係銀主盤，今年九月畀個投資者用二百八十萬接咗，裝修完即刻賣，成交價三百三十五萬，帳面賺成五十五萬。
啱啱開售完嘅上環帝后華庭，開賣前，淨係現樓示範單位都分開兩次睇。最深刻嘅當然係3座屬樓王級數嘅3房連套房單位，皆因成個盤只得80個，重唔會公開發售。
聽講，有買家出價成430幾萬，想買3座A室示範單位，發展商都覺得個價合理，原本諗住賣嘞，點知個客要求買咗個單位後，發展商唔可以再開放畀公眾睇，為咗顧全大局，發展商惟有拒絕出售，所以到𠵱家都重未賣出。
而同座同層嘅695方呎2房C室示範單位，同樣有買家一見傾心，發展商就重計緊數，好似要加成20幾萬至賣。
蘭西噚日返珠海參觀和黃樓盤，順道去咗電影《少林足球》中趙薇賣饅頭嘅舖頭食嘢，趙薇造饅頭嘅相，自然放喺門口當眼處做生招牌。而且學咗本港樓盤咁，搞啲比賽嚟打響知名度。間食店舉行食神盃陶瓷大賽，寫明參加者年齡不限，題材形式不限，但就要主題健康，頭獎有獎金三千蚊、二獎獎金二千蚊、三獎五百蚊餐券，大陸食店招攬生意手法都唔弱。
電盈嘅薄扶林數碼港住宅樓盤已經申請售樓，明年賣得，呢排電盈旗下電訊盈科基建業務主席李智康已經為樓盤不斷發功，一有時間就去人哋嘅樓盤取經。
噚日李智康就同埋左右手顏金施及史慕蘭，喺美聯高層陪同下，去咗睇跑馬地禮頓山。呢個新地喻為第三代豪宅嘅樓盤，重有現貨可以睇，所以佢對樓盤嘅用料同設施好感興趣。
李智康重透露會將自己周遊列國二十年嘅經驗放落數碼港度，務求要買家歎為觀止。
內地經濟迅速發展，先富起嚟嘅一群為數唔少，所以外國名牌子紛紛搶灘。好似長實北京東方廣場嘅寫字樓「東方經貿城」，啱啱又有名牌子承租，但今次主要屬於消費品，包括售賣LV皮具嘅LVMHPerfumes，賣酒嘅JASHennessy同RicheMonde，合共租咗超過萬六呎。
東方經貿城嘅租客包括胡關李羅律師行、思科系統、英特爾、可口可樂、Nike、勞力士、東芝、資生堂等，可見內地商機幾吸引呢。
蘭西
電郵地址：