近排成日聽班Friends話返深圳買衫，見佢哋一身潮流打扮，點都唔似係羅湖商業城貨色，細問之下先知道佢哋係去東門一個叫寶華嘅商場入貨。那裏的衫幾十蚊到百幾蚊都已經有交易，而且緊貼潮流，有好嘢當然跟住去睇睇。我覺得個場都幾大，其中有三間舖重好有利時Feel，型人型舖就連客人都型爆鏡，見機不可失即時訪問咗老闆，兼叫型人顧客推介心水選擇！
記者：黃希知
攝影：CarlZeiss
美容師GiGi
嘩！濱崎步呀，當我第一眼見到GiGi，重以為濱崎步真係去咗深圳，「由開張幫襯到𠵱家，呢度啲衫好啱我Feel，全身都係老闆娘幫我設計。」GiGi向我推介身穿的PunkLook格仔外套，配襯一條銀鏈型到爆，襯埋一條英國國旗皮帶及中Boot就Fit晒。
第一型舖
入到呢間叫做蘭桂坊的店舖，就覺得好有利時Feel，原來老闆娘Kitty係香港人。「以前呢度一啲都唔旺，但我覺得個場好有潛力，所以膽粗粗開咗第一間In舖，後來愈來愈多人效法，個場先開始旺。」雖然Kitty唔肯講營業額有幾多，但就我所見舖頭經常人頭湧湧，睇嚟生意都唔錯！
好多時Kitty都會即席幫熟客將件衫「改裝」，只見Kitty即席揮「剪」，一塊骷髏骨圖案加一個大扣針，幾分鐘就將件衫改頭換面，佩服！
模特兒CoCo
呢件TubeTop都係由Kitty設計，牛仔褲褲頭款式，加上誇張大圖案，性感得嚟又夠型，難怪模特兒CoCo最鍾意呢件。CoCo話：「呢度啲衫好有風格同味道，款式與眾不同，好似呢件TubeTop，有型又易襯，啱晒我嘅形格！」
髮型師May
一睇亞May嘅打扮就知佢崇尚和風，佢揀呢件紅玫瑰短袖T恤，衫袖同衫腳位都車上花邊，款式斯文，「我自己較鍾意黑色，所以買衫多數會揀黑色，好似呢件T恤設計簡約唔單調，襯黑色牛仔褲會幾好睇。」
店名：蘭桂坊
電話：(86)13823284707
地址：深圳東門步行街寶華樓地下B117號
營業時間：上午11時至晚上9時
第二型舖
原來老闆娘亞茹，以前喺蘭桂坊做過售貨員，「之前喺蘭桂坊做售貨員時見個場咁旺，咪自己開番間囉！我男朋友係香港人，好多貨都係佢喺香港攞嚟賣，其餘就係本地貨。本地人較鍾意香港款式，香港人就買鞋多。」亞茹表示，開舖一年多每個月已有萬多元的營業額，比以前做售貨員嘅收入多好多。
酒店接待員妹頭
一身牛仔打扮嘅妹頭，揀了這件薄身毛毛邊有帽嘅洗水牛仔褸，妹頭話：「今年興毛毛，隻色我都好鍾意，睇過其他舖頭都冇呢隻款，襯裙襯褲都咁好睇。牛仔褸拆下毛毛帽後，會變成另一個款，又可以多一種襯法。」
稅務員張小姐
舖頭比較多針織薄身款冷衫，其中熟客仔張小姐就睇中呢件淨色毛冷針織通花冷衫，「呢件冷衫衫身較闊，件衫質地好軟滑唔會拮肉，襯條貼身牛仔褲會幾好睇。」
店名：Model
地址：深圳東門步行街寶華樓地下B017號
營業時間：上午11時至晚上9時
第三型舖
AQ開咗啱啱一個月，我問老闆亞妮點解裝修唔玩得花巧啲？佢話舖頭想走較高檔的路線，所以每款衫都只會入一件。「我之前喺西武做時裝售貨員，成日想開間時裝店，見呢度幾旺所以揀呢度開舖。𠵱家我會去香港同廣州入貨，重代理咗幾個牌子。」亞妮話開張一個月，熟客唔多，所以到現時為止重未翻本！
售貨員Candy
眼前嘅Candy斯斯文文，形象同頭先兩間舖嘅客人好唔同，「呢度啲衫款唔會好前衞又唔會好老土，呢件薄身純毛T恤嘅衫袖同背脊都有綁帶，唔同綁法可以做出唔同款式，純毛質料摸上手幾舒服。」
店名：AQ
電話：(86)13602655558
地址：深圳東門步行街寶華樓地下B128號
營業時間：上午11時至晚上10時