喜劇明星爛滾、多情已經唔係乜嘢秘密，但真係諗唔到佢連屋企個菲傭都唔放過。
年幾前喜劇明星同個菲傭上完床後，個菲傭有咗BB，佢知道後就當然唔會認頭，即刻畀咗一筆錢個菲傭返老家。喜劇明星一直以為個菲傭會落咗個BB，點知個菲傭不但生咗個BB，最近重走返嚟香港打工。
呢個菲傭同人講，話明星出手好低（唔超過十萬），所以生完之後，將個BB留喺菲律賓，然後返香港搵新工，如果明星知道個菲傭返咗嚟肯定有排震。
喜劇明星做人一向孤寒同縮骨，幾年前佢喺新加坡召妓，因為一晚叫兩個，但完事後又唔畀貼士，後來重要俾嗰兩位小姐打去報館唱佢冇乜上床招式，所以話做人太孤寒冇乜着數。
陳文媛（BoBo）噚日去咗黃大仙出席港台活動，佢話自己好羨慕Twins嘅蔡卓妍（阿Sa）近日開咗間時裝店，BoBo話：「我好想可以賣精品同手工藝，我覺得開舖頭其實幾麻煩，要諗好多嘢，阿Sa都應該籌備咗好耐，佢成功一定有佢嘅本事。不過，我就一定唔會搵自己做生招牌。」
台灣人氣組合F4明年嘅情人節已經約好晒人，原來佢哋已經安排咗去馬來西亞同歌迷見面，喺吉隆坡武吉加里爾國家體育館舉行演唱會。製作單位噚日喺馬來西亞開咗記者會公布詳情，據知票價分港幣約一百元、一百八十元同二百六十元三種不設劃位，而三百六十元同五百元則劃位。F4咁受香港歌迷歡迎，唔知到時會有幾多人飛過去同四子過情人節呢？
吳君如最近瞓晒身拍嘅電影《金雞》，將會喺聖誕檔期上映。一向鬼主意多多嘅君如又有新搞作，佢攞咗舊年好受歡迎嘅電影《麥兜故事》入面嘅一首歌《噢！聖誕樹》，改晒歌詞變成《噢！金雞》，重搵埋佢嘅拍檔杜汶澤同埋老死曾志偉一齊合唱，認真搞笑。
日前鄭秀文（Sammi）為「亞洲遊戲展2002」拍攝咗一個《神奇女俠》電腦動畫MV，而為咗配合今次拍攝，Sammi要喺鏡頭前做多個唔同嘅表情，但Sammi喺短短兩個小時裏面就已經完成晒拍攝工作。Sammi日前話：「我淨係坐喺度一陣，已經搞掂個MV，好過癮新鮮，而且個造型好厲害，似得好緊要，連我自己都分唔到。」
新城新人獎名單出咗，張鎧潼同陳啟泰都冇份角逐，據知係佢哋嘅唱片公司口頭通知新城話唔角逐新人獎。噚日張鎧潼去銅鑼灣一個表展，心情似乎唔多靚，佢話：「冇得角逐今年新人獎，我都唔知道真正原因，可能係公司冇本事幫我fight個獎番嚟啩！」