呢排細價股好多都郁郁吓，兼夾成交唔細，起初以為班炒家今次實賺唔少錢，點知特別多炒家盤嘅靚女經紀又唔係咁講，佢話好多炒家重係成手貨。
好似由股壇女新秀主理嘅永成化工（850），上市以來一直大成交，小初重以為炒家已經散晒貨，但靚女經紀話唔係，皆因人哋想食大茶飯，唔會咁輕易收手。
永成每股以0.50元招股上市，一度炒過上去最高0.66元，之後曾經回落到0.55元水平，但近幾日又炒上，噚日升5%，收0.63元，成交有成1177萬元。
靚女經紀話，原本班炒家一早就散晒貨，但睇見咁多fans支持，估計炒風可以延續，於是又買番轉頭，所以到家陣重坐住唔少貨。
另外，好耐冇炒作嘅中國數碼信息（250），連續3日急升，噚日又升11.3%，收0.049元，真係好耐未見過咁熱鬧。經紀陳話，聽講隻股有動作跟尾。
慕容小初