黃家強和盧巧音老友鬼鬼，家強前晚在音樂會上更公開大讚盧巧音是個好女仔，二人在台上台下打情罵俏，家強笑言最愛飲女人煲的迷湯，還暗寸盧巧音前男友余文樂，實行討好盧巧音。
黃家強前晚在中環堅道明愛中心舉行「組Band時間家強第一GIG」音樂會，他邀得好友盧巧音（Candy）做表演嘉賓，二人在台上台下打情罵俏，儼如一對熱戀中的情侶。
家強在台上大讚Candy，他說：「佢係一個好女仔，唔知點解啲男仔咁對佢。」家強言語之間似暗寸Candy的舊愛余文樂，接着Candy即說：「唱歌啦，呢啲係兒女私情。」當Candy演唱時，家強除了拿出數碼相機為Candy拍照外，其後又從後抱起Candy，Candy沒料到對方有此一着，被嚇了一跳。
而二人在合唱時，家強又左手攬着女方纖腰，右手捉着伊人玉手，他們更是面貼面，台下歌迷情緒高漲並高呼：「咀佢，結婚！」
在演出完畢後，家強和Candy接受記者訪問，家強說：「我哋關係係好朋友，Candy係好女仔，但我重未係好男仔。」Candy笑言願意等他，家強轉口謂要立即追她，家強說：「佢可能怕咗我，我同佢舊嗰個同月同日生，Candy頂唔順佢，都頂我唔順，大家性格都差唔多。」Candy忽然對家強說：「你嚟我屋企，我煮埋飯，煲定湯等你。」家強聽後即口花花說：「我最鍾意飲迷湯，阿媽煲冇出面女人煲咁好味。」
家強不厭其煩地稱讚Candy，他說：「佢又專一，又識音樂同煮飯，我識咗佢十幾年，佢當年喺Black&Blue樂隊時我已經好鍾意。」問家強是否因為Candy跟余文樂分手才追她？他說：「使唔使，一陣又話我乘虛而入，人哋重傷心緊。」
採訪、攝影：李珮洳