數碼相機價錢不斷下降，搞到好多人都入市做機主，閒時影吓SnapShot的確幾寫意，到聖誕呢啲普天同慶嘅大日子，梗要影番一輯靚靚燈飾嚟留念，不過要影得滿意，並非單單㩒吓個掣就得，今日除咗推介適合影燈飾嘅數碼相機外，重會教大家三招基本功，唔使苦學十年八載都影到滿意靚相。
記者、攝影：徐影龍
ImageGirl：Patsy
雖然「工欲善其事，必先利其器」，不過要拍到滿意嘅燈飾相，係咪一定要部勁機呢？其實目前數碼相機發展已好成熟，好多二千零蚊低檔機都有好表現，尤其係預設嘅夜景模式，簡簡單單㩒下個掣就搞掂，新仔都可扮老手。不過預設模式往往缺乏靈活性，拍攝環境稍有難度，當場就考起初哥，影極都唔滿意。呢種情形具有光圈、快門先決或全手動嘅中價機就大派用場，透過調校數值，唔單止可影到滿意靚相，重可加入個人風格㖭。
富士S602減少RGB雜訊
屬富士中價機旗艦產品，除六百萬像素嘅SuperCCDⅢ外，最正係改良因長時間曝光而出現嘅RGB雜訊，就算用足15秒超慢快門拍攝，都唔會令到相片無端端多咗好多星星，打破SuperCCD慢快門嘅禁忌。
相關網址：
CanonG3光圈夠大
同為旗艦級機種，不過比富士S602有更大嘅光圈，達到F2.0，快門速度要求冇咁高，直接減低手震嘅機會。另外配備嘅四百萬像素CCD，足以應付A4尺寸打印要求，印靚相至啱。
相關網址：
digital_camera/powershot_g3/product.htm
SONYDSC-F717夜貓首選
SONY最新嘅「大炮王」，除保持五倍大口徑光學變焦鏡外，最大賣點係夜間對焦更為準確，加上設有夜視功能，稱得上係夜貓一族嘅數碼相機。CCD有效像素為五百萬，亦係三部機中最高。
相關網址：
diw/eng/index.html
第1招
光圈同快門嘅配搭喺攝影上嚟講屬基本功夫，不過亦非三言兩語可表達得到，要影到滿意燈飾，基本光圈要調校到最大（一般為F2.8），再因應現場環境光暗度，調校合適嘅快門速度，又或以光圈先決模式作拍攝，唔夠光不妨將快門校慢啲，反正數碼相機好處係任試唔嬲。
錯誤示範一：若用慢快門拍攝，就算少少手震都會顯現喺張相度。
解決辦法一：快門速度低過1/30，好易會出現手震情形，有腳架當然最好啦，冇嘅話都盡量利用附近物件固定相機或手部。
解決辦法二：可嘗試將ISO（感光速度）調至較高，如ISO400，便可將快門速度稍為增加，直接減低手震機會。要注意係大幅提高ISO數值，會令相片微粒變大及「起渣」，如非必要都唔好用。
第2招
除咗拍攝一大幅嘅大廈外牆燈飾外，商場都會擺設一啲好靚嘅主題布景，好多人都唔會放過影番張「到此一遊」相，不過要注意嘅係，遇着背景燈飾太光嘅話，就會出現「背光」情形。
錯誤示範：背景太光，面前又缺乏光源，搞到主題人物「口黑面黑」。
解決辦法：可透過機頂閃燈補救光源之不足，為避免閃燈效果太硬唔自然，可嘗試調細閃燈輸出，又或以薄薄一層嘅紙巾遮蓋閃燈，便可做出較柔和嘅光源。要注意係快門仍須調至較慢速度，如1/10、1/15等，擷取番多啲背景光，讓整體更自然。
第3招
基本上影燈飾冇乜構圖可言，因為背景通常好巨大，點影純粹基於你站立角度而定，冇乜所謂。不過若需要影埋人嘅話，就必須以人為主體，千祈唔好背景攞唔到，人又細細粒，搞到兩頭唔到岸，好多旅遊風景相就犯咗呢種錯誤。
錯誤示範：只求背景同人物都喺相入面，出嚟效果兩頭唔到岸，呢種錯誤最多人觸犯。
解決辦法：人物走至相機前幾步，就可突出人嘅主體位置，背景、人物相得益彰。若將人物稍向側移，或將相機微微扭斜，更可大大增加相片嘅生氣同美感。