要管理好一間公司，原來首先要管理好個廁所！八方唔係亂咁講㗎，呢個「理論」係出自康泰旅行社董事長黃士心把口嘅。話說康泰位於金鐘統一中心嘅新總社噚日開幕，旅行界都好畀面，有成二百人出席，搞到人頭湧湧，非常熱鬧。
黃士心可能非常高興，同在場記者介紹新總社嘅特色時，不斷讚賞價值三十幾萬嘅桑拿房，因為裏面有鍍金嘅洗手盆同坐廁，望落非常高貴。
佢重話總社另外嘅廁所用嘅係六千八百蚊一個嘅坐廁，同八千八百蚊一個嘅尿兜，比起好多酒店更加落本咁話。佢要求清潔員工每半個小時就要到廁所進行清潔工作，佢話「要管理好一間公司，應該要從廁所開始」，對廁所都咁認真，唔怪得康泰可以逆市投資成億買呢個地方嚟開新總社啦！
黃士心重愈講愈興奮，大爆總經理劉美詩月入十多萬元，同十年前差唔多，搞到伊人話要投訴佢侵犯私隱。
﹙圖﹚黃士心站在價值達三十多萬元的桑拿房內，洗手盆同坐廁都係鍍金，夠晒金碧輝煌。司徒世華攝
傳真︰2623-9278
電郵︰