個市都重係唔得，恒指曾跌152點，埋單9868。火種係電盈（008），以為5合1為咗部署成為大價股方便基金入市，點知散15仙，對拖低恒指影響有限，但影響人心，其他股票跟埋佢跌。
有啲大嘢由低位反彈，速度都好快，例如中移動（941）最低掟到20.45元，尾市嗱嗱臨上番20.85元，回升40仙，收市只係唔見15仙。Call輪9532收17.9仙，跌1.9仙，以10份輪兌1股計，9532跌突，係因為正股反彈之時，隻輪未跟得切彈番上去。經此一跌，隻輪溢價縮多一縮，得5.9%，係面世以來首次低過6%。窩輪隨住時間消逝，溢價漸漸縮細好正常，不過隻輪有成11.6倍槓桿率，6%以下溢價好吸引。另1隻Call輪9526，行使價20.50元，較9532行使價高20仙，溢價6.8%。9532溢價如果又係6.8%，值19.7仙，有1成水位。
聯通（762）亦係相對硬淨大嘢，最低5.80元，收5.90元，微跌10仙。聯通窩輪交投冇咁活躍，睇好聯通搵Call輪埋手嘅，數據最靚嘅係9512，但交投好靜，1球都唔夠，隻輪明年4月到期（壽命比9532同9526長3周），現價65仙，溢價8.5%，槓桿率9.1倍，唔算唔靚，但拍埋9532同9526，輸蝕好多。
章盛