樓價已跌了一大截，買家入市都左度右度，但尖沙嘴擎天半島禮拜日竟然出現兩宗，於半個鐘就落實入市嘅個案，重係七百幾萬嘅單位，認真厲害。
美聯物業助理區域經理謝嘉誠講，其中一個係1座高層B室，買家原本住港島區，因為家庭成員多，要買4房單位至夠住。睇咗一輪樓，間隔啱嘅單位，好多都超過兩千呎，銀碼超出預算，最後都係得擎天呢個近千七呎單位，間隔同銀碼都合要求，盛惠七百九十二萬一千。
至於另一個話咁快就入市嘅買家係投資者，本身住大埔，手上有兩三件貨，但都係月租一萬蚊樓下嘅貨色。今次越級挑戰，用七百三十八萬買咗1座中層E室，同樣近千七呎，買家選用首三年月供樓價0.01%嘅付款方法，咁入伙初期收到嘅租金，足夠供款有餘。果然好數口。
土地註冊處每日都會將啲最新成交落簿，即俗稱嘅datebook，任何人只要畀少少錢，都可以攞本簿嚟睇，裏面有齊物業地址、作價同交易雙方個名等資料。政府因為收緊私隱條例，所以由今個禮拜四開始，唔再落交易雙方嘅名，想要就再畀錢逐個查至得。聽講話係政府唔滿意有人抄啲資料再攞嚟賣圖利。
聽業內人士講，其實土地註冊處發售嘅成交資料光碟，舊年已刪咗買賣雙方嘅名。
由於𠵱家好多代理行，甚至測量行都有買呢啲資料嚟用，主要係攞買賣雙方嘅名同埋電話做coldcall。新措施開始後，呢啲公司就少咗途徑搵客，生意點都會受到影響。
每次行街，最能引起蘭西注意嘅，莫過於大廈外牆大型廣告牌。九龍城民生商業大廈（圖二），業主深明箇中道理，喺大廈重有2日就截標之時，特別發放大廈新增設嘅燈箱廣告消息，目的想點，梗係想為物業增值啦。
大灑金錢，準備鋪天蓋地宣傳嘅地鐵沿線樓盤藍天海岸，廣告攻勢厲害，每日打開報紙，就有唔同專業人士同你分享吓佢哋嘅生活態度，軟銷吓個樓盤。香港咁多份報紙，份份都有唔同廣告內容，迎合唔同讀者嘅口味。
聽講，淨係報章廣告都有成二十幾個唔同版本，嚟自學術界教授級代表有曹宏威、時裝界有馬永寧、文化界有李純恩、影藝人有馬浚偉同蕭芳芳、經濟學人有石鏡泉同盛智文，目不暇給。除文字之外，大家可能對影像會印象深刻啲，所以發展商搵著名攝影師夏永康嚟拍廣告硬照。佢過往嘅大作有電影花樣年華，同春光乍洩嘅硬照。
蘭西
電郵地址：