根據非正式統計，十個男人有九個都鍾意女仔對腳修長又有線條美，如果咁唔好彩，閣下天生唔係長腿姐姐，重要有對奪命甲組腳的話，咁都唔使閉翳住，事關深水埗今日起有個女裝鞋開倉，所有長Boots、中Boots同鞋仔，一律以超筍價$80-$150發售，只要你熟讀以下買鞋秘笈，識得利用唔同鞋款去掩飾你對粗壯雙腿，冬日也可以發放噴血魅力。
記者：尹珊珊
攝影：陳穎、周旭文
ImageGirl：Celina
貴為潮流界的中堅分子，基本上，每個女性都值得擁有一對或以上，其最大功用唔單止係保暖，重可以將條粗腿包得密密實實，幫你掩飾缺點之餘，一對高踭長Boots重可以令雙腳看起來更加修長，身形高大者固然一定要有對看門口，就算生得細細粒亦可以着出型格，今年流行款式有褶紋同尖頭加流蘇款，再襯埋今期熱賣的三個骨褲，有型又煞食。
原價：$499
開倉價：$150
貨量：30對
正所謂萬變不離其宗，呢對黑色羊仔皮長Boots雖然外表平實，但勝在夠襟興，無懼潮流的轉變，如果打理得宜，分分鐘着多幾季都無問題，最煞食重有佢對3吋高踭，望落更覺高人一等。
呢對粗獷味十足的燈芯絨長Boots，外層為幼坑紋燈蕊絨布，內裡是層滑身保暖海虎毛，雖然重未正式在市面曝光，但𠵱家趁住開倉，唔使半價都可以買到。咪睇佢質料薄而軟身，着上身就一定唔好睇，其實其最特別係可自行調校長短闊窄，只要穿着後把靴身的蝴蝶結索緊，摺短成中筒Boots都無問題，顏色方面重有黑色選擇。
原價：$299
開倉價：$150
貨量：60對
平時有留意開潮流走勢，相信都知道今年會勁興褶紋Boots，好似呢對杏色麖皮長Boots，靴身有層層褶紋，款式簡潔有立體感，靴身後面有拉鏈設計，方便穿着之餘，同時又可以將束腳褲套入鞋筒內，既是今季潮流打扮，重可以掩飾你對粗壯雙腿。
原價：$299
開倉價：$150
貨量：50對
坦白講，如果閣下的身高五呎差吋半，重擁有一對超級無敵短粗腿，下列各款中Boots真係同你無緣，事關中筒Boots本身極蝦人着，自問對腳無Kelly同GiGi咁修長，實在無謂獻醜了，除非着長裙或長褲稍為補救一下，否則只會出現粗上加粗的震撼場面！
軍人Look今季依然走勢凌厲，要襯番一身型格打扮，呢對款式較為中性的流蘇鐵圈中Boots，可謂食正個勢，雖然同樣都係流蘇款，但係加埋靴身的鐵圈後，隨即多了幾分粗獷味，以軍綠色麖皮做料就簡直係襯到絕，再唔係重有黑色同啡色任揀。
原價：$299
開倉價：$120
貨量：30對
總覺得高踭中Boots都係啱成熟女士多一點，呢對集流蘇同綁繩兩大潮流元素的平底中Boots，設計充滿少女味，簡單地襯套casualwear已經青春逼人，最啱得十零歲的長腿美少女，嫌米白色唔襟污糟，重可以揀黑色或啡色麖皮。
原價：$299
開倉價：$120
貨量：50對
根據過往經驗，着Boots最怕係靴身太窄，行得耐又會令腳踭赤赤痛，尤幸呢對棗紅色羊仔皮中Boots就無上述問題，一來羊仔皮本身質地好，着落輕身柔軟，行路時又唔會壓住腳踭，二來靴側有拉鏈設計，穿着脫掉都話咁易，如果工作性質需要長期站立，呢對中Boots可謂不二之選。
原價：$399
開倉價：$120
貨量：20對
冬天雖然興着Boots，但着慣鞋仔的你都唔係話無選擇，事關今次開倉的鞋仔，款式超過六十種，由鞋形、顏色以至質料皆可謂千變萬化，趕趁潮流有馬毛、蛇皮、破裂紋牛皮等等，充滿冬日暖意，至於款式方面，斯文大方的尖頭鞋固然是OL之選，重有款式簡單的輕便鞋，全部一口價對對$80，平平哋買來粗着都抵番晒。
馬毛唔一定顏色又啡又沉，好似呢對充滿日本少女味的格仔馬毛鞋仔，深啡配鮮黃隨即撞出搶眼色彩，淨係襯牛仔褲已經好好睇，少女們穿着都唔覺老氣。
原價：$299
開倉價：$80
貨量：50對
OL日常打扮都離唔開套裝或短裙，最啱係揀一對款式簡潔的尖頭鞋，好似呢對外形斯文高貴的羊仔皮尖頭鞋，既可襯裙，又可配褲，認真百搭，同款重另有粉紅、杏色同啡色。
原價：$259
開倉價：$80
貨量：50對
雖然蛇皮鞋唔算係今季大熱，好似呢兩對尖頭蛇皮鞋，款式乍看無啥特別，但勝在顏色選擇夠多，有藍、有綠、有黑又有啡，買對襯衫都好抵玩。
原價：$299
開倉價：$80
貨量：100對
經過特別處理的破裂紋牛皮，面層造成龜裂效果，顏色深淺不一，帶少許vintage的破舊感覺，但略嫌平滑的鞋底好易跣腳，落雨天時就要小心地滑了。
原價：$299
開倉價：$80
貨量：30對
一般女孩子買鞋嗰陣都會好雀躍，但着多幾次就會將對舊鞋打入冷宮，其實只要識得好好保養，舊鞋都可以保持光潔如新，𠵱家就等從事製造及批發女裝鞋有4年經驗的亞May，針對各類鞋的質料，同大家過番幾招打理貼士：
新買回來的麖皮鞋最好喺未着前，先在鞋面噴一層薄薄的防水麖皮水（於皮鞋店有售，售價約$20-$30），既可減低日後出現發霉的情況，就算唔小心整濕或者整污糟，用鞋刷輕輕一擦就可以輕易去迹。坊間重有一類有色的麖皮水專為着舊了的麖皮鞋而設，只要輕輕噴一噴，即有翻新的效果。
如果唔小心刮花了皮革表面，可以買支皮革專用的打蠟膏，塗少許在軟布上，再輕輕在革面上來回打磨，由於呢種打蠟膏呈透明色，適用於任何顏色的皮鞋上，就算平時得閒都可以用來抹一抹鞋面，令皮革保持光亮。至於去除皮面上的污糟，可以在軟布上塗少量去污膏，再於污迹上輕輕打圈，話咁快污迹即刻無晒。（亞May推介來自日本的get，可於大型皮鞋店有售，售價$20-$30）
Sunshine
地址：深水埗福華街63號鴻生大廈2樓B座
電話：27862268
開倉日期：即日至12月15日
開倉時間：上午11時至晚上7時
備註：尺碼由35至39齊碼