寫過《周莊水黑茶假》、《周莊魚湯》兩篇，引來讀者Windy及Philip電郵，菲臘分享旅行團到上海城隍廟食小籠包嘅故事，十分好笑。原來名店小籠包蒸籠有水草織成嘅墊子墊底，墊紙或因重複使用無數次，發出酸味，菲臘班團友見到都唔想食包。另外Windy就文筆可人（直情叻過左丁山十倍），佢話：「該地水黑茶假，是意料中事，我早已不買手信多時，周莊早被商品化，遊客喧嘩吵鬧，吐痰拋垃圾，足以踏平整個城鎮，清雅氣息，蕩然無存。」
話雖如此，Windy話周莊仍有可觀之處：「走在石板路上，步入明清舊宅，看一磚一瓦、一樑一柱，發思古之幽情，莫不慨嘆朝代興衰，滄桑世事，似水流年。」Windy警告左丁山，再抄多幾句，要同我分稿費。以佢咁嘅老練文章，叻過唔少專欄作家，請多啲來函賜教。
公關大姐大自上海回來，返到寫字樓就打電話嚟講上海，佢住在頂級嘅「四季飯店」，理應享受頂級服務，豈知道高級服務，視乎員工嘅訓練以及見識，大姐大話呢方面上海人與香港人仍有一大段距離，港人不宜妄自菲薄，但當然亦唔好容忍香港服務水平下降沉淪，我哋見到啲壞方法，就要批評。世界上乜事都有所謂bestpractice，但亦有worstpractice，大姐大喺上海食早餐，見到鄰枱客人起身去攞自助餐，無意中碰跌紙餐巾，佢自己唔知，侍應反應快捷，第一時間執起沾上地氈塵埃嘅白紙餐巾，放番上餐枱嘅麵包碟，人客施施然返到嚟，把麵包放在餐巾上！