玉女自從同花心男友分手後，佢嘅情緒都唔係咁穩定。馮仁昭就有朋友睇心理醫生時撞見佢。早排佢去尖沙嘴一間名店買衫時，有人就見到佢神情唔多正常，睇個樣好似係食錯藥，講電話大大聲，又約人去紋身，個人好似行唔穩咁，喺店入面嘅顧客都覺得佢古古怪怪。
咁都未算，玉女歌手夠膽死喺名店入面講完電話，就好順手咁攞咗一條值幾千蚊嘅鏈嚟戴。當時店入面有幾個人見住佢冇畀錢就戴埋條鏈走鬼咗，嗰啲店員又冇追佢畀錢，亦冇報警話有人偷嘢，因為佢哋知玉女神志唔係咁清醒，所以冇追究，只係通知佢經理人，後尾佢公司就搵人同佢畀番錢了事。唉！玉女繼續為個負心嘅人咁癲就唔值啦！
朱茵早排喺台灣拍蘇菲衞生巾廣告，佢已經係第八年幫呢個產品做代言。
廣告商安排朱茵喺台灣一個遊樂場拍攝，佢重要同隻駱駝做對手戲。不過隻駱駝好怕醜，要有佢嘅駱駝姐姐陪住先夠膽拍。朱茵話：「我之前都有見過駱駝，不過呢次終於有機會近距離同佢哋接觸，佢哋好得意，我同佢哋都合作得好開心。」
劉德華同梁朝偉日前去咗星馬宣傳《無間道》，噚日佢兩個一齊由新加坡返香港，機場一早有二十幾個華仔fans等接機。其實華仔每次出入機場都會有大班fans接送，偉仔今次就趁混亂唔覺唔覺閃走咗，佢女友劉嘉玲前日生日喺上海過，偉仔就出埠公幹，睇怕偉仔係唔想俾人問唔賀女友生日一事，先至會低調走人。
莫文蔚噚日同埋爹哋、媽咪喺尖沙嘴開記者會，宣傳莫爸爸出版嘅新書《1934年香港年仙乩及珍藏預言》同莫媽媽出版嘅《VCD英語拼音（中級2）》。
莫爸爸識得占卜問卦，莫文蔚話當年唔知簽邊間唱片公司好，都有叫過爸爸起卦，結果係加盟滾石後就走紅。
成龍同曉格蘭特套《八十日環遊世界》分分鐘開唔成，所以呢排成龍就有時間周圍去參觀。早排佢上過一艘美國航空母艦參觀之後，日前佢又喺香港參觀過另一隻航空巡洋母艦「小鷹號」，佢話隻母艦好似一個小城市咁大，令佢大開眼界咁話。