港府在財赤龐大，要求全港市民共同承擔之際，竟然宣布補貼20億元興建機場展覽中心，而競投嘅發展商只需投資4億元，理由係希望租金可以更具競爭力。呢一招係數碼港嘅翻版，由政府補貼嘅數碼港，尚未推出就已令太古A（019）東區商廈租金受壓，機場展覽中心亦勢必令新世界（017）旗下會展租金受壓。港府一味以增強競爭力為名，不斷進行計劃經濟，香港嘅自由經濟唔通真係已經名存實亡？阿董咁搞法，香港財赤唔繼續大增就真係有鬼，亦叫本地及海外投資者卻步。若立法會咁都肯撥款，就認真對香港人唔住。
長江生命科技（8222）噚日表示，在愛滋病治療研究方面有突破性發展，並會斥資3.7億元支持研究。股價隨即借勢反彈7%，收報1.54元，成交亦有2167萬元。Cookie話，傳聞此股早有春江鴨收集，暫訂目標係炒至1.70元開始散貨，因為產品距離成功推出之日仍遙遙無期，暫難吸引國際性基金長期投資，暫時只會短炒。
前幾日，一眾股民以為電盈（008）可能翻身，但公司一話股份5合1後，股價噚日即急挫逾10%，跌至1.29元收市，成交達4.84億元。市場再傳電盈併股，係為供股鋪路，就算供完股之後，股價都唔會跌到變仙股咁肉酸。黑客話，市場其實主要擔心持有電盈約14%股權嘅大東出現財政壓力，會賤價沽出電盈股權，穆迪上周五將大東債券降至垃圾評級，更係觸發電盈恐慌性拋售嘅原因。
會德豐（020）同旗下嘅聯邦地產（077）及新亞（049）噚日停牌，市場話同私有化有關，但由於會德豐負債偏高，相信唔會同時將旗下兩股私有化，相信只會先私有其中一隻，ｅ莉莎話係新亞。
阿虎