經常往返羅湖，在偶然的機會下認識了一對當地的小情侶，小情侶阿哲和阿娜極之熱情好客，經常帶我四處遊逛，知道我早陣子搬屋後還未添置燈飾，便帶我到有燈飾建材街之稱的田貝四路逛逛，呢條街的確無令我失望，滿街都是大大小小的燈飾舖，由豪宅啱用嘅水晶吊燈到日本部屋嘅膠燈都有，款式靚之餘，最緊要係價錢抵過香港多多聲，一於唔客氣，借公事為名做私事為實，藉機買番盞燈返香港先。
記者：歐嘉荃
攝影：小王子
阿哲和阿娜呢對小情侶雖然並不在深圳出生，不過阿哲由上海移居往深圳已有20年之多，對深圳的大街小巷都極為熟悉，就好似今次介紹的燈飾街，都是哲兄的好介紹。而身為西安人的阿娜則是導遊，對深圳和廣州的景點及購物點均琅琅上口，絕對是我的盲公竹。
全條街都係燈飾店，正盤算行邊間之際，阿哲同阿娜就話要去呢間大舖，佢足足有三層樓，約有五萬平方呎，果然係無介紹錯！店內的貨色多來自西班牙及中國本土，由貴氣十足的水晶燈，到最啱後生一族的清簡款式都有，的確琳琅滿目。
行勻全店，阿哲同阿娜呢對小情侶最鍾意呢盞座枱燈。雖屬中國本地土炮，但燈罩用咗由英國進口的PVC製成，形狀夠晒過癮，而我最欣賞燈罩的波浪摺紋，簡單得嚟又有少許花巧，備有黃色同紅色任擇。
尺寸：約16吋高
售價：?110
＊使用40W燈膽或20W慳電膽
行行吓，又畀我見到一盞唔錯嘅座枱燈，負責人蘇小姐話呢盞燈的金屬位用鐵製成，鐵面再塗上啞光色，唔會生銹，而燈罩就用咗略帶啡色的仿羊皮紙製成，能增添室內的懷舊氣氛。蘇小姐話呢盞燈好受年輕人歡迎，好多人價都唔講就掃返香港。
尺寸：約21吋
售價：?260
＊使用40W燈膽或20W慳電膽
我同阿哲都覺得，店內最搞鬼就係呢盞石頭燈，全盞用了雲石雕製而成，由西班牙入口，盞盞都係根據雲石的形狀由師傅雕製而成，所以每盞燈的外形都會唔同。不過呢盞燈好重，建議買完即刻搭的士走，如果再行街的話，唔手軟先怪。
尺寸：約1呎高
售價：?680
＊使用5W燈膽
店舖內佔半數都係豪華水晶燈，阿娜話點都要睇睇，好似呢盞水晶燈，有點豪華版花樣年華Feel，的確幾正。負責人說：「盞燈來自埃及，全盞的水晶都由人手穿製而成。」不過我就最鍾意燈罩內吊着的3粒大水晶，感覺夠晒貴氣！
尺寸：約12吋高
售價：?2,300
＊使用60W燈膽
我哋成班人繼續沿路行，發覺好多燈飾店都係舖頭大大，可惜燈飾少少！行到街尾才被櫥窗前的日式燈吸引住，呢間店舖的燈飾主要來自大陸，燈飾充滿田園風味，不失為都市人的另一好選擇。店舖同樣可為顧客更換三腳插蘇，以及安排託運服務，不過運費每公斤需要?2.5。
呢盞燈充滿濃濃的營火風味，三支長樹枝搭成丫叉形，樹枝上再吊上一個竹製的燈，感覺有如小時候去露營的營火一樣。負責人李先生說：「這盞燈的設計較為特別，全部由人手製成，而燈罩的日本紙就來自日本，質地較厚，只要用雞毛帚一掃便可將塵掃走，清潔方便。」
尺寸：約55吋高
售價：?398
＊使用25W燈膽
唔知中國的手工係唔係真係好平呢？呢盞設計成茅屋的燈亦全由人手製造，整盞燈選用粗幼不同的竹製成，粗竹成為屋身的支架，而幼身的竹枝就成為屋頂，充滿濃濃的日本風味，我覺得做床頭燈就最好不過。
尺寸：約12吋高
售價：?275
＊使用60W燈膽
除咗日式燈吸引外，阿哲覺得其他燈款都唔錯，好似呢盞南瓜燈就夠晒實用，架上是一個玻璃南瓜，而燈罩下是一個CD架，重可以放到35隻CD，絕對是最實用的選擇。
尺寸：約30吋高
售價：?358
＊使用15W燈膽
利興燈飾
地址：深圳市田貝四路73號
電話：﹙86﹚75525535111
營業時間：8:30am-9:30pm