我求大俠已經唔止一次咁讚今季嘅西甲聯快上快落好好睇，睇完前日皇家馬德里大勝馬略卡嘅比賽之後，又忍唔住要再讚一次；實在速度同技術兼備，又娛樂性十足，真係捱眼瞓都抵。
不過，唯一美中不足嘅就係黑衣判官尼圖嘅表現，我求大俠並唔係話尼圖有啲乜嘢錯誤嘅判決，而係場波嘅節奏實在太快，尼圖走到喘晒氣，有幾次重跟唔上㖭！比賽節奏明快係今季西甲聯賽嘅特色，奉勸西甲聯嘅黑衣判官快啲操好體能，如果唔係比賽時球員唔抽筋反而球證抽筋就唔好啦！
英甲巴拉福特欠債纍纍，球會頸巾每個月只係賣出一百條，但自從《哈利波特》套戲推出之後，由於主角哈利成日戴住嗰條頸巾嘅顏色同設計跟巴拉福特嘅球會頸巾一樣，突然多咗好多人買巴拉福特頸巾，今年就已經賣出咗一萬條，令球會多咗六萬鎊（約七十二萬港元）收入，連巴拉福特市場總監加利夫都話多謝哈利施法。
前晚祖雲達斯失身畀布雷西亞，教練納比賽後被炮轟輕敵同立亂排陣。我求大俠覺得「銀狐」真係抵鬧。要留力咩？隊波到禮拜三先對巴素利，重要有主場之利，前晚做乜要先收起迪比亞路、用未上力嘅比索圖同埋搵森保達墮後守右路？諗諗下，佢哋上個禮拜中響意大利盃出個隊形重完整啲。斷估佢唔會覺得個盃仔重要過聯賽啩。難為前晚錯信佢哋嘅波友……。
NBA溜馬教練湯馬士噚日比賽完咗之後，揸車返屋企途中，因為駛咗入一條封咗嘅路俾差佬截停，本來都冇乜嘢，衰就衰在湯馬士拒絕拎個車牌出嚟，態度好唔合作；後來啲差人知道佢係溜馬教練，都算畀面只係向佢發咗張告票，但係湯馬士始終好唔「老嚟」。依我求大俠之見，湯馬士既然為人教練，都知循規蹈矩好重要，如果唔係啲球員點以佢為榜樣！
以奧地利為家嘅F1車手拉夫舒密加近日又超速駕駛，被警方捉到，見慣大場面嘅拉夫以為「撻朵」就可以逃過一劫，點知重比個差佬串番轉頭話：「如果你係拉夫舒密加，我就係阿力舒華辛力加啦！」雖然最後拉夫終能「驗明正身」，但都要照罰可也，由於佢係第三次違規，要被釘牌三個月；即係話拉夫喺呢段休賽期，唔可以過揸車癮！