美國女歌手Pink嘅形象一向中性得嚟又夠激，我羅拉都幾欣賞佢嘅真性情，唔會好似啲玉女歌手扮咁純情。Pink接受訪問時經常話唔知自己有乜好，反而覺得自己係一個好怪嘅女仔，不過唔知係唔係佢怪過頭，佢飲醉酒後，竟然打到佢個保鑣入廠。
話說今年唱片好賣得嘅Pink，近排去咗澳洲演出，上星期五佢飲大兩杯，夜晚返Adelaide'sHilton酒店時突然舞興大發，喺酒店入面間吧搞搞震，重跳上人哋個吧枱度跳舞，個酒保當堂俾佢嚇親，即刻叫阿Pink落番嚟，但呢位阿姐當堂發老脾，發嬲之餘重想踢人，嚇到周圍嘅人定晒型。
跟住佢幾個保鑣想𠱁番佢落嚟都冇辦法，最後其中一個爬上去捉佢落嚟，但代價就係要俾佢係咁樁。有目擊人士話：「阿Pink揼中個保鑣隻手，佢即刻叫到好似隻狗咁，好明顯佢真係痛得好犀利，所以佢拿拿聲去咗醫院急救。」而打完人嘅Pink拍下屁股就走咗，跟住重同班朋友蒲到朝早六點。