年尾流流，小初重諗住大家等過年，唔會有大動作。不過，靚女經紀同小初講，近期股價顯著下跌嘅金科數碼（922），短期內可能會控股權易手。
金科上手大股東電視藝員，曾經搞過幾次收購，但都冇樣成功，收尾因為水緊，賣殼畀幼稚園校長，但校長在10月初，因為同承按股份嘅債主有多少爭議，搞到股份曾經要停牌。
雖然金科講明，大股東手貨冇做到按揭，但怪就怪在股價近排經常乾跌，似有向下mark價嫌疑，好似噚日咁，成交唔夠3萬元，但股價就跌咗18.8%，收6.5仙，係52周新低。
基於金科股價跌得咁離奇，靚女經紀嘅講法非空穴來風，但小初聽完，則覺得有多少感歎。
講起股價急跌，停牌半年嘅中國物流（217），噚日復牌最低見過8.1仙，收11仙，勁跌56.8%。經紀陳話，中國物流有買家提出全購，出價每股9仙，呢個價非常有啟示性。
慕容小初