日本本田車廠將會為旗下大受歡迎嘅Fit（即港版Jazz），響今個月20日推出FitAria四門房車版；新車不但擁有Fit本身嘅吸引造型外，兩台分別係1.3公升及1.5公升嘅i-DSI引擎，亦能有低耗油量嘅表現㖭！
從外表方面而言，新款FitAria依舊保留有原車嘅線條，就連A柱旁嘅小窗亦被保留下來，望落份外突出吸引；但由於改用房車化嘅三廂式設計，亦好有一份家庭房車風采呢！而且重有五種顏色任君選擇，當中包括全新嘅GraciousBeigeMetallic㖭！車廂布局亦保留有靈活多變嘅好處，除後排座椅可作6:4收摺外，當有需要時前排座椅亦可收摺，以增加尾廂載物容量；除此之外，設備配搭亦見齊全，而頂級版重備有桃木裝飾㖭！
另外，廠方為照顧不同用家嘅需要，特別提供有1.3公升及1.5公升i-DSI引擎作選擇，而平均耗油量分別係前者20.5km/L，及後者嘅20.0km/L，係咪好慳油呢？懸掛系統亦經過強化，令其有不錯循迹性外，當然唔少得重有G-CON車架結構及雙安全氣袋，所為你帶來嘅周全保護啦！未知香港代理方面，有無興趣將之引入呢？