大市噚日早段在萬點關口爭持，其後電訊盈科（008）跌勢轉急，拖低電訊股股價，恒指收市9868，跌105點，成交55億元。
藍籌股走勢轉弱，大市調整之勢未止，50日線（9643仍在上升中）係好友最後防線，能守得住，第2浪反彈有機會出現。電盈宣布5合1，原意係引基金入場，但揸家唔係咁諗，因為市場有過唔少例子，合股通常都冇好下場，所以唔理三七二十一，沽咗先算，電盈股價就係咁跌，質到低位1.29元收市，大跌10.4%，成交更大增至3.63億股，沽壓咁重，暫時不宜博反彈。
國企股相對較硬淨，最靚都係大行揸重嘅上海石化（338），尾段重一度逆市而升；東方航空（670）收1.07元，跌1個位，大盤繼續收集，升勢隨時再起。大陸資金蟄伏一大段日子後，近期又轉趨活躍，國企係佢哋初步炒作嘅對象，不妨跟轉順風車。
本欄10月初時推介星光集團（403），指係收息賺價對象，當時股價0.31元，近日曾上升到0.47元水平，噚日收0.445元，升幅逾3成。推介星光原因，係其業績自經過低潮後，已重新進入增長期，PE低息率高，最新宣布的業績亦「對辦」，可繼續持有。
02年9月止的半年，星光營業額3.59億元，微升5.5%，但獲利2988萬元，則大增61.7%，每股盈利7.35仙，中期息派1仙。
盈利大增，主要是集團加強成本控制，提高生產效率，以及利息支出下降，期內行政費用減少逾1000萬元至4533萬元，而利息支出亦減少170萬元至341萬元。由於集團現金流量改善，手頭有現金及存款約9600萬元，下半年度利息開支可持續減少。
集團深圳廠房擴充，新增兩條生產線，另在蘇州的新廠房已於本年8月投產，估計04年營業額達7000萬至1億元，兩年內可提供盈利貢獻。
現年度，盈利估計可達5500萬元，升41.3%，每股盈利13.5仙，派息2.5仙，預測PE3.3倍，息率5.6厘，仍屬賺價收息好對象。不過，由於近期股價已升4成，可候其調整時才吸入。
郭兆誠