修咸頓嘅前鋒比亞堤真係勁，啱啱攞咗超聯十一月份最佳球員，前日贏伯明翰二比○嘅聯賽又有入波。不過，就唔知修咸頓領隊史特根講真定玩嘢，佢竟然喺賽後話比亞堤未夠班入選英格蘭國家隊喎！
我求大俠就覺得佢係唔想比亞堤自滿居多。
唔講你唔知，原來比亞堤好信有外星人存在，重似足電視劇《X檔案》中嘅男主角莫探員咁，相信美國政府有大陰謀掩飾外星人嘅真相，佢重用莫探員嘅口脗講：「我相信有外星人存在，亦相信我哋有權知道呢個秘密。我有冇同外星人接觸過？喺我記憶中就未曾俾佢哋擄走過。」
唔通就係呢股外星神秘力量令比亞堤愈踢愈醒？
「神奇小馬尾」巴治奧好波就係人都知，不過原來佢有一個死穴，就係唱歌好難聽，所以就算佢效力嘅布雷西亞球隊球員灌錄慈善唱片，佢都堅持唔參與。我求大俠就覺得巴治奧唔使咁執着，呢啲咁嘅慈善唱片都係凑熱鬧居多，而且就算真係要獨唱，人哋都會明白你係為善最樂，唔會笑你啦。
早輪我求大俠笑過韋斯咸嘅領隊羅達亂點鴛鴦，要伊恩皮亞斯做前鋒，難得羅達「貫徹始終」，喺前日對米杜士堡嘅聯賽仍然搵佢做箭頭，不過佢今次終於生生性性入到波，令球隊領先二比一，不過韋斯咸始終晚節不保，俾米杜士堡嘅伊奧古喺完場前兩分鐘追和，認真冇運。
AC米蘭對羅馬係大波一場，難得i-cable.com網上直播，我求大俠當然唔會錯過，不過就睇到有啲心噏，因為「巴迪高」巴迪斯圖達真係好唔掂，佢下半場好近咁對住龍門都射到離行離列；佢射失波後，教練卡比路黑口黑面，而個鬼佬評述員重衰，話：「Unbelievable！換轉兩年前佢一定入咗啦。」當年嘅「獅子王」、「戰神」都係時候諗吓退休嘞……唉。
向來口不擇言嘅英國流行歌手RobbieWilliams噚日又發癲，喺德國一電視台節目上，向另一位嘉賓德國車神舒密加口出狂言，話佢嘅F1好友畢頓來季會擊敗呢位五屆世界冠軍喎，向來冷靜嘅舒密加初時對呢位歌星嘅說話都有啲訝異，但隨即一笑置之。係車迷都知畢頓投身F1兩季以來成績平平，我求大俠如係舒密加都唔嬲啦，咪當佢發噏風囉！