聖誕節一班朋友開Party，要有嘢食有嘢玩兼想冇人騷擾，不如去朋友屋企啦！嘩，搞到烏煙瘴氣之後，拍拍屁股就走，邊有人肯攞自己間屋教非！不如去大大間餐廳？又話嫌貴嫌迫。
其實，𠵱家新一派樓上Cafe，十零個Friend每人夾百零二百蚊就可以包場開派對，除咗有Homemade食物提供，重可以向天使許願，有人體彩繪、塔羅占卜、即場LiveBand……等節目，任揀任玩，係咪好盞？
記者：李玉蘭
攝影：陳陶鈞 部份相片由被訪者提供
ImagePeople：Jessie&TonyFromImagineLtd.
兩個新鮮熱辣中大工管畢業生Angela(22歲)和Shanice(21歲)，外表一個溫柔一個嗲，竟然親自落手落腳，設計一個以天使星星為主題、Fancy到爆嘅私人空間，盡顯少女浪漫本色。內裏多多玩具、書本雜誌，似足女生宿舍，令人倍感舒服輕鬆。未止，佢哋重會分飾幾個角色招呼客人玩唔同活動……
Shanice話自己勝在「新鮮」畢業，心口有個「勇」字，恃住大學時讀過電腦設計，Angela中學時讀過Arts兼有七年壁報三年做布景經驗，因應不同客人的要求，布置不同主題的派對，包場期間，還會為客人免費提供BodyPainting，畫有燈有禮物嘅聖誕樹，只需5分鐘；畫簡簡單單嘅雪人，2、3分鐘搞掂，兼且開完派對，一洗就甩，乾手淨腳唔使煩。
每次包場都送15分鐘塔羅牌占卜運程，因為時間所限，通常只能令一，兩個人受惠，所以最好大家事先傾掂數！但係問前程其實可以靠自己，只要喺願望紙上寫下心底話，成功拋入「許願天使台」枱上的小盆，便會願望達成！靈唔靈？嘻嘻，查實呢條橋係兩位女主持諗出嚟嘅浪漫想法，就算唔信，都大可以攬實男/女朋友，喺細細哋嘅露台欣賞銅鑼灣夜景，係咪已經好浪漫？
Angela係St.Paul唱詩班成員，Shanice係個鋼琴老師，重教緊個有七級水準嘅細路仔，就算要佢哋即席表演《紅豆詞》、《滿江紅》都無問題，但係大節流流，當然係聽冧歌情歌聖誕歌最應節啦！如果想聽歌，想合唱都得，記住話畀佢哋知喇！
去Party唔記得買禮物唔緊要，因為呢度嘅大小飾櫃擺滿由幾十蚊起嘅原創首飾、手工藝等，揀啱至買就唔怕捉錯用神啦！但驚喜就梗冇㗎喇！
PocoAngela
地點：銅鑼灣新會道4號4字樓
電話：25779887
包場人數：20至35人
包場費用：由12月20日至1月1日每位$160，包食物和兩杯飲品（3小時）
開放時間：11:30am至12:30am（每日可開四場）
小貼士：包場可獲來賓簽名布、電子邀請卡，代訂鮮花賀卡，特價訂購Homemade蛋糕等，Shanice重可以幫你做司儀。
兩對情侶老死四個人加埋差不多一百歲，因為拍拖無碇去，兼且一對情侶鍾意食嘢，一對鍾意玩，不知幾頭痕！於是索性喺三個月前開咗間私竇，既可以落腳，又有啲細藝，大節「臨頭」更索性將滿肚計仔公諸同好！
咪睇呢度幾百呎地方，開業至今三個月，已經被人包場搞過PlayStation大賽、睡衣派對、萬聖節派對……遲啲重會有制服誘惑之夜、小小音樂會等。咁有經驗，若果你遲遲諗唔到Party玩啲乜，大可以同店主坐低齊齊傾。店主之一的Kelvin話：「啱Key嘅光線、音樂、食物足以令人好易開心，再加上玩吓集體遊戲，包保開心到癲都得！」
Kelvin同女朋友Joanne都係做家具行業，所以好識用唔同枱椅、顏色將幾百呎店舖分成：可以畀你大字形攤唞嘅休閒區、可以好放鬆咁食件CheeseCake嘅Cafe區、畀你買刁鑽小擺設嘅購物區，同埋擺滿玩具、車仔畀你慢慢欣賞嘅收藏區！再加上主持們不時將燈光的光暗調校、轉換音樂，盡量配合你當時各種各樣嘅歡樂氣氛！
所有嘅食物都唔係大規模製作，只係由一對自小愛上入廚嘅情侶Chris（從事玩具）同女朋友Annie(從事廣告)細心即叫即做，單是一件外表普普通通嘅奶油多，已有陣陣香味，引到你流口水，舔舔脷！
SeeYouThen
地址：銅鑼灣波斯富街56號1樓前座
電話：34225103
費用：12月23、24、31日三小時包場$3,500（包括$1,500食物，每加一小時收$350）；25、26日及1月1日三小時包場收$2,800（包括$1,000食物，每加一小時收$250）
時間：12:30pm至1:00am（每日可開四場）
包場人數：15至30人
小貼士：需其中一人付$20當會員才可包場，但可回贈咖啡券