大市完成第1個反彈浪，開始進入調整期，恒指由反彈高位10247回落，上周五最低見9809，但能高收9973，顯示大市在10000水平仍會爭持多一段時間。不過，由於美股走勢已轉弱，相信短期會拖累港股，繼續調整。
高人跌市預言見報後，引起頗大迴響，對術數有研究的讀者飛鴿傳書，話呢個月唔會發生大件事，股市重應該會繼續上升。事實上，預言準與否，要事後才知道，不過高人今年中嘅預言就好靈，凡事都係小心啲好。
同朋友傾開，佢哋話，如果睇圖表，市勢唔似會大跌，極其量跌多3、4百點，即係落到9600的50日線水平，都應該企得住。調整完之後，反彈浪會持續，目標仍係指向10400至11000。既然圖表派短期亦睇淡，唔揸重貨，唔會蝕底，真係手痕，短炒亦無傷大雅。講真，呢個月假期咁多，趁機會出外玩吓，散吓心，返嚟之後，「危險期」亦已過去（希望安然度過），又可再度出擊。
藍籌調整，H股就接力而上，其中以石化股最有力。睇走勢，H股呢個浪，應該重可以升多10至20%，石化股行先，上海石化（338）、儀征化纖（1033）同北京燕化（325）都可以短炒，至於其他H股，筆者就對東方航空（670）較具好感，一來佢落後，二來又有消息，升勢可能會較急。
中國航空業重組已落實，西北航空與雲南航空明年將併入東航，預期可帶來更佳營運效益，加上折讓期延長，以及內地油價制度改革，都對集團有利。今年上半年，東航的煤油開支11.2億元人民幣，佔其總營運成本21%，估計全年23億元人民幣，油價每調低10%，盈利即可增加2300萬元人民幣。
國泰航空（293）與東航已建立策略夥伴關係，市場有消息指國泰擬入股東航，積極開拓內地業務。東航能引入國泰成為股東，對公司長遠發展極為有利。
東航近日走勢已突破圓底形收集區，正進行後抽整固，上周五成交增加，動力轉強，破1.1元升勢將可確認，短期目標指向1.25元。
郭兆誠